Na theih tengteng ṭulmi Meithal/Bomb hliamhma tuam hlawm dan

Miṭhen cun kan sentet lai in tlawngca ih kan zir mi thu tamzet cu kan nun lamtluan ih hman ṭangkai dingin mizaran tamsawn hrang ah hman theih ngai le atakin ṭhathnemnak an nei lo tiah an sim.

Cuhnakin zovek khalih kan tong/tuar thei ringringmi cangsualnak, thawsaam lai ih thaw pek/thawt thei dingih tuamhlawm awkdan, thi thei ding khawp in rawl haak tikih tuamhlawm awkdan, meithal hliamhma tuamhlawm dan tvk pawl hi kan sentet lai in tlawnginn ah zirhawk thei sehla mizapi hrang ah tamzet ṭhathnemnak a um sawn ding tiah an sim. (hivek hi santhar hnu ah kawlram tlawng pawl ah an zirh maw zirhlo ti cu ka ciang lo nan, kan nih san lai ahcun kan rak zir lo)

Cumi ah atufang kan ram dinhmun thawn milawbik le kan theih poimawh zetmi pakhat cu hliam tuar (meithal, bomb, naam tvk …) tikih tuamhlawm awkdan hi a si.

Atufang ramsung um mipi cu thihnak khaamtlang ih ding ringring thawn an bangaw ih ziang tik lai khalah meithal kap le bomb puah tuar thei ringring dinhmun ah kan um. Curuangah cuvek dinhmun kan thleng tikah ziangtin kan tuamhlawm ding ti hi kan thei a poimawh zet.

Hliamhma besia kan tuar tikah ziangtin kan tuamhlawm ding…?

Atlangpin Kg 68-81 hrawng i rit kumkim upa taksa ah 1.2-1.5 gallons (4.5-5.5 liters) thisen a um ih hriamhma lole thidok tivek ruangah kan taksa ihsin cumi zat thisen ih zaṭek 40% a suak cun thih a theih tiah siivai thiamsang pawl in an sim.

Hliamhma tuar ruangih nunnak liam mitamsawn cu thisen tamtuk suaknak ruangih thimi an si tiah zirzoinak neitu pawl in an hmusuak ih hliamhma kan tuar ah maw, kan kiangkap hliamhma tuar an um ah maw, ziangtin kan tuamhlawm ding … ?

Cat loin thisen a put tikah minute 3 sungah kan nunnak a cem thei. Curuangah hmaisabik ih kan tuah ṭulmi cu thisen suaknak hawl hmuh hi a si. Kan hngilh lo dingmi pakhat cu mi kan tuamhlawm hlan ah kanmahteh kan him maw timi kan thei ciang ta a ṭul. Asancu nangmah na hliam ve a si le tuamhlawm tuding an um lo/nang mah khal tuamhlawm na ṭul dingih vansiat cun thih hloh a tam sawn ter thei. Curuangah na safety hi number 1 ah na ret ṭul.

Thisen putmi phit sak hi hliamhma tuar pawl thi lo dingih kan tuah sak theimi thil thupibik a si ih hmaisabik ah thisen putnakbik kha hawl aw. A cang thei le na ngaihven hlan ah kuthruk bun aw. Na tuamhlawm hlan ah kiangkap hnen lole phone in maw bawmnak dilta tengteng aw.

Hmaisabik ah hlimhma zawn kha tizawi thei puan thawn hliamhma tuartu dinhmun zoh in nam aw. Nunau thidan khal thisen put phit nakah a tangkai zet. Cutin kan tuah a si le hliamhma ih zirin thi put nak zawn ah a thisen a khaal thei ih a luangsuak ding dang pawl kha a rak kham thei.

Hliamhma phit nakih na hman mi puan a ciap thluh khalle hlon hlah. A par in a dang nen bet sawn aw. Na phelh pang cun puan thawn a erh awmi thisen khal kha na dir ngah dingih a thar in thisen a suak sal thei.

Athupi zetmi thisen suak control dan

Leilung tha (Gravity) hin thisen a ti luang cak tiah mithiamsang ṭhenkhat in an sim. Cumi simfiahnak ih an hman mi cu “na kut na thlir tikah vansang sawn ih na thlirmi kut ah tangta sawn ih na retmi hnakin a var (thisen mal ruangah) sawn in a lang ding. Thuaitasawn ih na retmi kut kha thisen tam in a sen cuang ding” ti a si.

Cuti a si tikah kut ih hliamhma na tuar mi kha nathin hnaka hnakih sang ah thlir aw la thisen luang dan a ti mal ding ih thi put nak na phit mi kha tamzet a lo bawm ding. Nan, thi putnak kha na zetin hmet a ṭul ti kha hngilh aw hlah.

Na paang, ṭaang le na hngawng tivek ih hliamhma thi put cu tuamhlawm dan ding a har zet. Hliamhma tum deuh a si le a sung khal ah puansia fai an hrawh ṭheu. Thi put nak zawn rori ah puansia fai thawn na kut hnih rorin nam aw. Siizung thleng hlan sung lole Siivai hmanrua thawn lo bawm tuding an thlen hlan sung catbang loin thiputnak kha puansia fai thawn hru aw la na kuthnih rorin nam ringring aw. Cutibak lo cu tuamhlawm dan dang a har.

Thiputnak kiang in puansia fai lole hri thawn reek a ṭha maw?

Ram cangkang ahcun Ke lole Kut tivek hliamhma tuar tikih hman dingmi “tourniquet” timi an kol tlangpi. Cumicu thiput pit dingin hliamhma kiang ih reek nak ding device a si.

Cuvek hmanrua a um lo nak ahcun hridai lole puan tivek thawn thiputnak kiangin an ṭawn reek ṭheu.

Himi tuamhlawmdan cu Siivai thiamsang ṭhenkhat in a ṭul tuk caan lawng ah hman ding a si an ti. US ram ih Doctor pakhat cun hitin a sim fiang.

“Doctor cun ‘na Kut Ke maw na nunnak sawn’ tivek dinhmun lawng ah hman cii a si. Hivekih caan reizet an reek mi Kut Ke cu tan a ṭul tlangpi. Reek na cing in thisen a suak thotho tla cun a santlai tuk lo. Thisen huul rori ding khawp ih kan reek tikah kan Ke-Kut ah thisen a feh lo ih a rak siat ṭheu. Curuangah tan lo theih lo a si ṭheu” a ti.

Thih thei ding khawp ih thisen put dan
1. a zit rorin thisen zit suak
2. hliamhma ihsin cat bang loih thisen put
3. leilung lole zial ah thisen a lit tikah
4. puan lole bandage tivek ah sawr thei ding khawp ih thisen a um caan
5. Kut bul Ke bul
6. hliamhma tuartu nikhua theilo biak theihlo ih a um caan lole lung aa in boruak umdan zianghman theithiam nawn lo ….

Leave a Reply

Your email address will not be published. Required fields are marked *