Na Theih Ṭul Tengteng mi Hmaikhuh Fing Khawi Dan

Covid 19 in Leitlunpi a nuai ih a zia deuh nak ram an um bang in a luar thok nak ram khal a um ve.

Mipum 1 million luan nunnak lak zotu Covid 19 lak ih kan him thei dan ding lamziin pakhat cu a leng kan vak suak tikih hmaikhuh bun hi a si tiah mithiam pawl in an sim.

Miṭhen cun hmaikhuh kan bun cun a tawk ti`n kan ruat men hi a rak diklo. Hmaikhuh khal ah Covid 19 nathrih a rak kai thei ruangah kan hruh/phoih tikah fimkhur zet a ṭul tiah Centers for Disease Control and Prevention in tlangthannak an nei.

Na hmaikhuh tham hlah
Hmaikhuh kan bun mi par khal ah nat hrik a kai thei ruangah tu le tu tham ding a si lo. Kut thawn hmai tham lo ding an timi hi hmaikhuh kan bun mi hrang khal ah an sim tel cih a si ti`n ruat aw. Na tham pang a si khal le na kut kholh lohli aw.

Na bun/phoih hlan ah kut kholh ringring aw
Thilri par ah nat hrik a um thei ih na hmaikhuh khal ah nat hrik a rak kai pang thei ruangah na bun/phoih tik khalah kut kholh ringring aw.

Na hmaikhuh sawp ringring aw
Voikhat na hman veten sawp cih lohli aw. Na sawp lohli manlo a si khalle duhduh ah ret men lo in hnipuan bal sawp ding mi lole hmun hran te ah ret lawk aw.

Tihlum le satpia thawn sawp aw la dryer setting sang deuh lole ni tleu ah pho aw. Amah lawng khal sawp a theih ih na sawp tik ah tihlum le satpia thawn a malbik second 20 nuai aw la hmun hlum/sa ah pho aw.

Hmaikhuh na sawp tik ah puanvarsii hmang hrimhrim hlah. Na hman pang cun na hmaikhuh a ei ṭet dingih hmuh theih lo ongkua a suak ter dingih na hruh leh sal tik ah na hrang ah ṭih a nung.

Mithaimsang pawl ih sim mi hmaikhuh
Hmaikhuh mankhung (N95, N99) hmang thei lo hrang ah mah te tuah cawp cotton fabric (T-shirt, Towel) hmaikhuh a ṭha bik ti`n mithaim pawl in an sim ih Social Distance daan thlun har nak hmun mibur lak ih hman ding ah cotton fabric thawn tuah mi hmaikhuh a ṭha bik ti a si.

Leave a Reply

Your email address will not be published. Required fields are marked *