Myanmar ram ih hman thok dingmi Covidsheild an soisel nak san

2021, January 27 in Myanmar ram ih hman thok dingmi Covid 19 vaccine “Covidshield” thawn pehpar in thuthang phunphun a suak ih a dawt duh hrihlotu khal an um.

Ziangruangah Covidshield an dawt duh lo! Ziangtin an tuahmi si! ziangruangah an soisel tvk pawl cu ca siartu mipi hrang ah thiamsang pawl ih simmi kan run tarlang sawng ding…

Covidshield cu ziang a si?
Oxford-AstraZeneca tuah mi Covid 19 dokhamsii a si ih Leitlun vaccine suah company tumbik Serum Institute of India in a suah sak. SII in Covidshield tiah hmin a pek mi a si.

Covidshield cu hritlang nathrik thawn bangaw deuh mi, Chimpanzee Zawng tumpi taksa par ihsi lakmi virus (adenovirus)thawn tuahmi a si. Cuih virus cu minung siatsuah theilomi Coronavirus bang dingin an rem bet ih vaccine ah an tuah.

Cuih sii/virus cun kan taksa sungih pangang (microbe) pawl cu Covid 19 nathrik do/theithiam dingin a vung zirh hai.

Ziangruangah Covidshield an soisel?
Asuahtu Serum Institute (SII) cun Brazil le UK ram ih zirzoinak phase 3 trial an nei mi data khihhmuh in a him tuk ko an ti.

Nan, All India Drug Action Network cun “India rammi hmangin zirzoinak hran (bridging study) an tuahlo ruangah a him ngai le ngailo thu ah rinhleh a um deuh” an ti. Cumi ruangah mi ṭhenkhat cun Covidshield vaccine dawt ding an hreh phah thluh.

All India Drug Action Network in Covidshield a soisel mi thuthawn pehpar in mithiamsang pawl cun “ṭihphanding hran a um lo. Asancu, Covidshield dawt sinnak (clinical trails) an tuah lai ah mirang, midum, asian rammi ti`n miphunkim an telh ih zaṭek 90% rorin hlawhtlinnak an hmu a si. Curuangah India mipi hrang khalah siseh Asia ramdang mi pawl hrang khalah siseh a him ding ti zum a um ko” an ti.

Serum Institute of India (SII) company cun India mipi hmangih bridging study nak cu February thla hrawng in kan nei thok tum tiah thuthang an suah a si.

Leave a Reply

Your email address will not be published. Required fields are marked *