Motor thawn pah pet ih a tlan hlo san mi cu A Rậng a rak si ziar

England ram mi Fathetha Begun Abedin (kum 29) cun lamziin kaan lai Putar pakhat cu motor thawn a pah pet ih a tlanhlo hnu ah a pah ngah mi putar cu kum 61 mi, a Rậng (father-in-law) a si timi a thei suak leh.

Hih buainak cu February 2018 kum ih thilthleng a siih motor thawn a Rậng pah pet tu Fathetha Begun Abedin cu kandung tlawngkai nithum ah thu ṭhen sak a si.

Fathetha Begun Abedin cu 2018, February ni 5 zaan ah thil lei dingin a motor thawn a suak ih a Rậng khal sungkhat naivai leng dingin a suak ve. Atlun lam ah phone tham phah in motor a mawng ih lamziin kaan lai a Rậng cu hmu man lo in a pah pet.

Mi ka pah ngah ti a thei veten va dom sawn loin a tlanlan vivo. Accident lai cu CCTV in a rak zuk ngah ih video sungih lang mi motor zoh sin in palik cun cuih motor cu an hawl thok.

CCTV sungih lang mi motor vek ciah neitu Fathetha Begun Abedin cu palik in ni 11 sung thusutnak an nei hnu ah ‘kei mah ka si’ ti`n a phuangaw leh sal.

Thusutnak an nei thok ahcun ‘asthma thawthawthar nat ruangah ka lung cii a mit ih zianghman ka thei lo siding’ a ti. A Rậng a pah ruangih motor thlalang kuai cu, ‘fifir pawl in ka phone fir an tum ih motor thlalang an sut siat’ a ti. Cuhlei ah accident lai ih phone a hman mi history le message 32 khal a delete thluh. Palik pawl cu a phunphun in a bum hai ih a netnak ahcun zeep thei loin a phuangaw thluh.

An thuhla cu kandungzarh tlawngkai nithum ah Leicester Crown Court ah relciannak an nei ih, Judge Robert Brown cun “Motor na mawng ih phone na tham phah ruangah Lamziin kaan lai, na Rậng na pah ngah. Mi ka pah ngah ti thei cingin na tlanlan.”

“Khai zaan khal ah Palik in motor mawngtu ah ruat in mawh neilo mi pakhat an kai. Cuhleiah mawhphurh hrial in thuphan na sim. Curuangah na tuah mi hmuahhmuah cu nang mah in na tuar ṭul. Tu ah thawngthlak na si” ti`n thu a ṭhen sak.

Fathetha Begun Abedin cu thlun ding mi Daan pah bal in motor a mawng ih mi a pah ruangah thla 6 thawngtlak le thuphan sim ruangah thla 12 thawng thlak bet dingin thu ṭhensak a siih kum 2 le thla 9 sung, motor mawn khal an kham cih a si.

Leave a Reply

Your email address will not be published. Required fields are marked *