MIZORAM – Ni 30 sungah Voi 12 LingHnin

Mizoram : Tlawngkai ni 5 ah 4.2 magnitude thacak linghninnak a suak ih, cumi siar telin ni 30 sungah Mizoram ih linghnin voi 9 a suaknak a si tiin Mizoram cozah in official in a phuang.

Champhai district kiangkap ih hnin a siih zaanlam nazi 3:56 hrawng le zaan 10 luan hrawng ah voi 2 tiin, nikhat ah voi 3 rori linghninnak a suak tiah livemint website le earthquaketrack website cun an tar lang.

Official in cu ni 30 sungah voi 9 ling a hnin ti a si nan, rintlak website ṭhenkhat cun ni 30 sungah voi 12 rori ling a hnin an ti.

Linghnin cun Chin ramkulh Falam khawsung tiang a hngawng ban ruangah khawsung mipi an thin a phang zet. Mizoram, linghninnak thawn neihawdeuh ih um, East Tuipui bial tluan mipi khal thlaphang in zaan ah an it ngamlo tiah theih a si.

June thlacem lam khalah Myanmar-India ramri hrawngah ling a hnin ih, cuih linghninnak cun Zokhawthar ih biakinn le bazaar ban pawl a ti khing a si.

ref:TOI,earthquaketrack,Livemint

Leave a Reply

Your email address will not be published. Required fields are marked *