Mizoram ah Covid 19 vaccine an hmang thok ding + Mizoram dinhmun

January 16 in India ramhuap Covid 19 vaccine tlangzarh dingmi cu Mizoram khal ah a thleng fel zo tiah theih a si.

Mizoram ih tlangzarh dingmi Covid 19 vaccine cu Oxford-AstraZeneca tuah, Serum Institute of India ih suah sawng mi Covidshield vaccine a si ih mipum thawng 10 luan deih, Covid dokhamsii cu January 14 ah a thleng fel zo tiah newslivetv in a tarlang.

Covidshield cu Cozahpi khuakhandan vekin state health care worker mipum 14107 leh central health care worker mipum 314 pawl hrawng tawlrel a si ih, cumi ah doctor, nurse le ambulance driver telin mipum 8000 luan an dawt hmaisabik ding.

Sidawt nak ding hmunram khal tawlrel a si zo ih January thlasung ni 9 sungah nikhat mi 800 hrawng an dawt ding a si.

Hih thu thawn pehpar in Mizoram harhdamzung ṭuanvonei mipakhat cun “India harhdamzung thusuak vekin hmasabik ṭum cu harhdamnak lam hnaṭuan pawl dawt hmaisabik an si ding. Cuhnu ah kum upa kum 50 luan pawl le damlonak nat dang nei cia ti`n a sangsang ten an dawt vivo leh ding” a ti.

Health department tlangthan dan ah Mizoram sung vaccine dong hmasabik dingah Civil Hospital Aizawl, Kulikawn Sub-District Hospital Aizawl, Urban PHC ITI Veng Aizawl leh Civil Hospital Lunglei pawl an hril tiah newslivetv in a tarlang a si.

Google ih tarlangmi vek a si le tudinhmun tiang Mizoram ah Covid 19 mina 4,310 an um zo ih mi 9 thi in mipum 4,200 an dam sal a si. India pumhuap in Covid 19 mina 10.5M an um zo ih, cumi ah 10.1M dam sal in minung 152K an thi a si.

Leave a Reply

Your email address will not be published. Required fields are marked *