Miss Universe : Myanmar aiawhtu in Kawlram hrang a aupi ih Singapore aiawhtu in Asian hrang a au ve

Miss Universe national costume competition ah Myanmar aiawh ih zuamvetu Miss Thuzar Wint Lwin cun Hakha thuam hruh in “Myanmar ram hrangah thlacam uh” timi catar thawn kan ram buainak Leitlun mipi i ngaihsak dingin a pho lang.

Min Aung Hlaing hohami kawl ralkap in rampi ukhruai thuneihnak an la hnu, May 12 tiangah nauhak 50 luan telin mipum 800 kim zik an that zo. Cuihtlunah kaihkhih tuar minung 4000 kim zik an um thlang.

Cuvek a si tikah Leitlunhuap ram pawl in Kawlram buainak ngaihsaksin dingin Miss Thuzar Wint Lwin in a pholang mi a siih, hitiih cangvaihnak a nei mi hi mitamzet ih fak a hlawh a si.

Singapore aiawh in Miss Universe zuamvetu Bernadette Belle Ong khalin Leitlun ram dangdang (abikin US ram) ih um Asia mi hmuhsuam zawmtiahnak titawp dingin a aupi ih Singapore thantar kawrfual a hruh mi dunglam ah “STOP ASIAN HATE” timi cangan a ti lang.

Abikin US ram ah Asia rammi thleidang an tuar cuang ih Asia huatu kut tuar ih nunnak liam khal an tamzet zo.

Stop AAPI Hate Reporting Center (Hate against Asian American Pacific Islander communities) ih tarlang mivek asile Covid 19 boruak ah a hlan hnakih let 1 tam in US ih um Asia rammi huat ruangih sual tuahtu an pung ti a si.

Cuvek dinhmun a si ruangah Asia rammi huat ruangih sual tuahtu um nawnlo dingin Bernadette Belle Ong in a aupi mi a siih “STOP ASIAN HATE” tiih nganmi cu Leitlun mipi hmai ah ralṭha zetin a pholang a si.

Miss Universe national costume competition cu May 13 (Eastern Time Zone) ah Hollywood, Florida ih tuahmi a siih Final nipi cu May 16 ah tuah an tum tiah theih a si.

Leave a Reply

Your email address will not be published. Required fields are marked *