Minung thinlung pu lo Palik Sual maktara khal an rak um ko……

Midum George Floyd thihnak in a puakkuai termi US ram ih vun rong thleidan dodalnak, a dik lomi thuṭhennak pawl remṭhat dilnak le palik thunei sinak hmangsual in cangvai ṭheutu palik dodalnak pawl cu pehzom vivo a siih, US cozah le palik lam khalin an hmai baltertu cozah hnaṭuan pawl thianfainak an nei rero ih, tukhalah midum thatṭheh duhtu le midum pawl hrem cak zettu palik 3 cu hnaṭuan ihsin banter an si.

An pathum in Wilmington, North Carolina palik an siih, US cozah in tlakhat voikhat a check ṭheu mi palik motor sung ih retmi camera (dashcam) audit an tuah nakih hmuhsuak mi a siih, an pathum in midum an huat zia, hrem an cak zia le that ṭheh an duh thu an rel lai cu palik motor sung ih camera in a rak zuk ngah ṭheh.

An pathum in midum that an duh thu an rel lai fangah Officer Michael “Kevin” Piner motor sung ih camera cu a rak nung pang ih amah, a hnaṭuanpi Cpl. Jesse Moore le Officer James “Brian” Gilmore ih ṭong mi hmuahhmuah a rak record ṭheh.

June 4 ah palik motor ih bun mi dashcam audit nak an neiih ṭong borhhlawh, n-cafang hmangin midum that an hiar thu, vung rong thleidannak ruangih rampi a buai khalle midum pawl thatṭheh dingin an man zo thu, Officer Michael “Kevin” Piner in ramsung buainak suak tikih midum pawl kapnak dingih assault rifle lei a fial thu, map sung ihsin midum pawl hrutfai ṭheh dingin US ramsung ah buainak a suak tengteng ṭul thu” an rel lai pawl cu dashcam in a zuk ngah ih audit neitu Wilmington PD Sgt. Heflin in a hmusuak ṭheh.

Culawng siloin an hnaṭuanpi midum palik bawi pawl hmuhsuam, hnihsuaksai nakih an hmang lai, Pathian in midum pawl hrangah hell ram special in a tuahsak thu tvp khal an rel ih an ṭong mi hmuahhmuah cu dashcam in a rak record ngah ṭheh.

An pathum in Wilmington Police Department ah kum 20 luan hnaṭuan zomi an siih an mah vekih lungput ṭhalo, vun rong thleidan thinlung nei le palik sinak hmangsual dang khal hawl vivo in zingzoinak an nei vivo ding thu Wilmington Police Department hotu cun a sim a si.

ref:NYPOST,CTL

Hnimsin: Wilmington Police Department report kimcang ih na siar duh le hinah hmet Wilmington Police Department REPORT

Leave a Reply

Your email address will not be published. Required fields are marked *