Minung Sa ei tiih puhtuar Tlawngsaya cu German palik in an kai

September thla lam ihsin hlothok zo mi Stefan T thattu siding zum um mi cu Germany palik in kan dung tlawngkai nithum ah an kai.

Berlin khau pawn veng pakhat park sung ah filhfai ṭheh mi minung ruh hmuhsuah a si hnu ah German palik in zingzoinak an nei thok.

Mithattu tiih ruah mi Tlawngsaya Stefan R umnak innpi

Ui fim hmang in park sung ih Minung ruh tantatu` keneh an zawt vivo ih zingzoinak an nei mi in maths le chemistry Tlawngsaya a khihhmuh ruangah kum 41 mi Tlawngsaya cu German palik in an kai.

Palik lam cun an kai mi pai` hmin an phuangsuak lo nan a thuhla theiciangtu Bild daily cun kum 41 mi Tlawngsaya Stefan R a si ti`n an tarlang a si.

Park sung ih minung ruh hmuhsuahmi cu kan dung September thla lam ih mihlo kum 44 mi Stefan T a si ti`n palik lam in naamhngetnak an nei zo ih mithi tui` mobile data zohciannak an nei.

Minung ruah an hmu nak Park sung

Mobile data zohciangnak an nei mi ah mithitu in mithattu` inn a va pan lai ih a to mi Taxi, online dating website ih an tongaw dan le an pahnih karlak ih thil umdan pawl an hmusuak thluh.

Tlawngsaya Stefan R cu a umnak inn ah palik in an va kai ih a innsung khal an cawklet thluh.

“A umnak inn kan va siim cu Siizung ih hman ṭheu mi Minung ruh at nak Hluah, Minung tisa ei ral thluh thei mi sodium hydroxide cuai 25 kan hmusuak. Vur kuang tumzet khal a kol nan a sung cu a ruak. Asinan a umnak innsung ah rinhleh ummi Thisen neh a um” tiah zingzoinak neitu palik Steltner in Bild daily hnen ah a sim.

Steltner cun park sung ih Minung ruh hmuhsuahmi thu thawn pehpar in,”a sa an ei ih a ruh an filhfai thluh ti`n kan zum. Mithattu siding kan zum mi Stefan R hin minung sa ei dan thawn pehpar mi online ah nasaten a hawl” a ti.

Stefa T thattu tiih puhtuar Stefan R cu tu ni tiang a ṭongsuak duh lo ih a thuhla cu palik in zingzoinak an nei pehzom vivo tum a si.

Leave a Reply

Your email address will not be published. Required fields are marked *