Minung 9 That tu Twitter killer tiih Theih lar Takahiro Shiraishi a phuang aw

Twitter killer tiih theih lar Japan ram mi Takahiro Shiraishi (kum 30) cun 2017 kum ah minung 9 ka that a si ti`n, tlawngkai nithum, Japan thuṭhen zung ah a phuang aw.

2017 kum ah Japan palik in mihlo hawl in Takahiro Shiraishi um nak appartment ah an lut ih a inn sung ah minung taksa bel cawng an hmu ruangih kaih mi a si. Tuah, minung 9 that tu tiih an puh mi cu a dik ngaingai a si tiih a phuanawk ruangah hngawng ih thlai that dingin Daan tat thei dinhmun a si.

Twitter Killer ti ih theih lar Takahiro Shiraishi

Numi thlem in hlawhhlang khawvel ih zuar ṭheutu palai a rak ṭuan ih a umnak kiangkap mipi in a hnaṭuan thuhla an thei ciang vivo ruangah a hnaṭuan tlansan in Kanagawa Prefecture, Zama khua ah 2017, August thla ah a ceer ih, cuih hmun ih a um hnu thla 3 sungah minung 9 a that.

Kha lai ah Japan ram hi leitlun mah le mah thataw tambik ram lak ih tel ve a si ih nun bei dong ih mah le mah that aw duhtu an tam zet. Cucu, Shiraishi in caan rem ah alak ih Twitter hmang in mi thlem ding a hawl.

Online Social profile ah “Nunbeidong ih harsatnak phunzakip tuartu pawl ka bawm duh. Zangfahten DM (direct message) in kuat uh” timi a ngan ih thataw danding bawm tum lole an mah thawn thi tlang ding in a bum hai siding ti`n palik report ah a um.

Tleirawl pawl a bat deuh ih a pehtlaih tu pawl cu a inn ih ra dingin a sim hai. A that mi minung 9 lak ah kum 15 mi tel in numi 8 an siih kum 20 mi mipa pakhat cu a fala a va hawl nak ah a rak that. Inn khan 1 le bathroom pakhat luah a si ih cuih inn bi te ahcun minung ruak pawl cu a can ih vur bawm ah a ret ṭha.

Takahiro Shiraishi an Kai

Kum 2017, Otober thla hrawng ih mihlo, kum 23 nute cu a tlangval pa in a pehtlaih thei lo ruangah palik hnen ah a report.

A tlangval pa cun a fala nui` Twitter account a ong thei ih a history pawl an zoh sal tik ah Takahiro Shiraishi umnak appartment lam a khih hmuh ih an va hawl tikah rin lo pin Shiraishi inn sung ah minung taksa bel cawng an hmu ih Shiraishi cu an kai cih.

Amah cun an paisa duh ruangih that mi vekin a rel lawk ih zingzoinak an nei mi ah, a nauhak lai ihsin a rualpi pawl thawn hngawng ih rekaw thawphit lek nak cii khat an lek ṭheu timi an theisuak ih mithi pawl hngawng khal ah kut ih rek nak neh a um ruangah a thii ah mithat duh nak a tel hrimhrim ruangah hivek in mi a that mi siding ti`n zum nak aum.

Paisa duh ruangih that mi vekin a rel mi cu palik lam in an zum lo ih zingzoinak an nei bet tikah a umnak inn ih CCTV zuk ngah mi video pakhat an hmu.

Cuih video ahcun mihlo tiih report mi, numi pakhat thawn inn sung ih an lut lai a lang. Cunui` Twitter account an zoh tikah “thih pi ngam tu mipakhat ka ṭul. Thih ka duh nan kei mah lawng ka thi ngam lo” timi cakuat an hmusuak.

Cunu khal cu a that mi lak ah a tel ih a taksa a can hnu ah vurbawm sungah a ret. Miruak can mi tamsawm cu mi in a hlawn lai hmu ding phang ah inn ah a ret ih palik in an va kai ṭum ah minung ruh 240 an hmusuak.

Inn a luah nak

Thuṭhen Zung Ah

Minung 9 a that ti mi mawhpuhnak cu “a dik thluh a si” ti`n thuṭhen zung ah amah Takahiro Shiraishi rorin a ṭongsuak.

A lawyer pa cun Daantatnak demdeuh dingin “Thih duh ruangih an pan mi a si ih an mai` duhnak tel in a that mi a si” a ti nan Takahiro Shiraishi cun zuk sung ih mithi ruak Lu dunglam hmape pawl khih hmuh in “talbuai thei lo dingin ka tuah mawh nak a si” tiah a mai` duhnak thlun ih a tuah sawn mi si zia a sim tiah NHK media in a tarlang.

Hih thuthang hin Japan a ti hnin ih thuṭhen zung ih a din lai zoh tum tu minung 600 hrawng an tlar. Tuah, Takahiro Shiraishi in a si dan dik a phuang suak thluh ruangah Japan ram Daan vekin a hngawng in thlai that thei din hmun a si tiah NHK media in a ngan.

ref:NHK,Reddit,Wiki

Leave a Reply

Your email address will not be published. Required fields are marked *