Minung 5 thattu Lal Tlan Chhuaha cu Mizoram Thuṭhenzung in Daantatnak Nei

Kum 2015 ih mi 5 thattu Lal Tlan Chhuaha (kum 42) cu, tui ni 9 November 2020 ah Mizoram thuṭhenzung in damsung thawngthlak dingin thu a ṭhen sak.

Lal Tlan Chhuaha cu November ni 5 ah Addl. District & Sessions Court ah suah pi a rak si ih Cozah ukil le mithi tei` ukil cun Thih Daan tat dingin thuburnak an nei nan sualtuahtu lam in kumkhua thawngthlaknak thawn hremdan ṭhum deuh dingin an rak ngen.

Mithattu Lal Tlan Chhuaha khalin thilsual a tuah mi par ah a siraw thu le poi a ti zet thu a rel suak ih Thih Daantat lo dingin zangfah a rak dil.

Tuini 9 November 2020 ah Mizoram thuṭhenzung cun sual tuahtu Lal Tlan Chhuaha cu a tuah mi vek in thuṭhensaknak a nei ih hremnak a pek mi pawl cu a tanglam vekin an si.

Pu Lal Tlan Chhuaha S/o Parzuala, Republick Mualveng, Aizawl, Hremnak
1. Thubuai section 449 IPC – Mithat tum in mi inn sung ah a luhcilh ruangah kum 10 hnaṭuankhung thawngthlak le Rs. ting 2 cawhkuan (Paisa kuan ding a nei lo le kum 2 thawngthlak ṭhan ding)

2. Thubuai section 307 IPC – Mithat a tum ruangah kum 10 hnaṭuankhung thawngthlak le Rs. ting 2 cawhkuan (Paisa kuan ding a nei lo le kum 2 thawngthlak ṭhan ding)

Note : Himi hremnak hi a kop aw lo. Kum 20 hnaṭuankhung thawngthlak lai ah paisa kuan ding a nei lo le a hran ten kum 4 hnaṭuankhung thawngthlak belh ding.

3. A tlun ih thubuai 2, kum 24 sung hnaṭuankhung thawngthlak hnu ah, mi panga a that mi thubuai section 302 IPC ah damsung thawngtlak ṭan le paisa Rs. ting 2 kuan ter a si ding. Azate kom in Rs ting 10 a kuan ṭul ih kuan nak ding a nei lo le kum 4 thawngthlak ṭhan belh a si ding.

Netabik hremnak an pek mi cu a hnuailam bangtuk an si.
1. Kum 20 sung hnaṭuankhung ṭuan phah in thawngthlak a si dingih paisa kuan ding mi Rs. ting 4 a pe thei lo cun kum 4 ṭhan bet a si ding. (kum 24 sung hnaṭuankhung thawngthlak)

2. Cumi kum 20/24 thawngthlak a si hnu ah damsung thawngthlak ding ni a ṭan thok ding. Paisa kuan ter mi a pe thei lo a si le damsung thawngthlak tlun ah kum 10 belh bet a si ding.

3. Cutin, kum 34 sung (Rs. ting 14 cawhkuan a pek thei lo cun kum 34 thawngthlak ding) thawngthlak a si hnu ah damsung thawngthlak ṭan a si ding.

Lal Tlan Chhuaha in Pu Siama te` Inn a luhcilh

Aizawl : Kum 2015 ih tualthatnak rapthlak a thleng mi a siih hih thuthang hin Mizoram a hnin ter.

Mithattu Lal Tlan Chhuaha le a that mi Pu Sang Lian Siama (kum 57) hi hnaṭuan tlang an siih Pu Siama hin Fridge sia a rem nak ah a hruai ṭheu.

Pu Siama te inn ah minung 7 an um ih vansiat an tong ding zaan cu minung 5 lawng an rak um.

Zaan thim hnu ah Lal Tlan Chhuaha cun Pu Siama te paisa dil dingin a va pan hai ih Rs. 1000 an rak pe.

An pek mi duhtawk lo in a dil bet hai ih tiaw thiam lo in an ṭongkam a sang vivo. Culai ah Lal Tlan Chhuaha cun naamtong a cuh lohli ih Pu Siama cu a dawt that.

Cuhnu ah innsung ih um inteknu Khual Thangi (kum 57), fapa an cawm mi Isaac Lal Rin Nunga (kum 6), intekpai` naunu Van Lal Chhungi (kum 54) le an inn ihsi tlawngkai Samuel Lal Rin Chhana (kum 14) pawl cu a sangsang ten a that thluh hai.

Kiangkap venghnen pawl in an thawmvang an thei nan innsung lam in tawh an hren ruangah run dingin zohman an lut thei lo.

Mibur cun innleng lam in an hro ciamco ih an thawmvang a ring vivo ruangah mithattu cun ṭih in tukvirh lam in a dawp suak.

Ziin sak, mi innsung ah a relh ih mipi in nazet ih kut an thlak man hlan ah Palik an thleng man ih a himdam fangfang. Cutin palik in an kai ih mipi pawl ih kut thlak thei lo dingin an hum hnu ah thawng an thlak a si.

Hih thuthang hin Mizoram a khawng na tuk ih tu ni tiang lungawi thei hrih lo an tam zet. “Christian ram kan si ih ngaithiam nun nei ding’ titu an um ih minung 5 nunnak rori a lak ruangah a mah nunnak khal lak ve a ṭul titu khal an um a si.

Leave a Reply

Your email address will not be published. Required fields are marked *

error: hahahahahaha !!