Minung 40 luan le Caw 5,800 phurtu Gulf Livestock 1 Lawngpi a Hlo

New Zealand in China ram pan ih feh mi rannung phur Lawngpi Gulf Livestock 1 cu Japan tikulh kiang a thlen ah Typhoon Maysak thlisia in a nuai ih Lawngpi cu thilsia le tisuar lakah a hlo ti`n Japan cozah in official in a phuang.

Gulf Livestock 1 Lawngpi cun hnaṭuantu minung 43 le Caw 6000 kimzik a phur ih Japan tikulh Amami Oshima thawn peng 115 hlatnak a thlen hrawngah Typhoon Maysak thlisia in a nuai.

Amami Oshima tikulh tipi kap ih duty pawl in tlawngkai nithum zinglam nazi 1:45 ah bawmdilnak signal an dong ih bawm dingin an va feh cu, nunhim kawr hruk mipkhat lawng an va hmu.

An runsuak mi cu Filipine ram mi Gulf Livestock 1 Lawngpi chief officer Eduardo Sareno (kum 45) a si. Amah cun “tisuar tum zet in kan Lawng a khawng ih a engine a siat. Hna a ṭuan nawn lo.”

Gulf Livestock 1 chief officer Eduardo Sareno (kum 45) an runsuak lai

“Kan Lawngpi cu thlisia le tisuar lak ah a pil cuahco ih nunhim Kawr hruh dingin thuthan authawm ka thei. Kawr ka hruk ih tidai sungah ka dawp cih” a ti.

Hih Lawngpi ah Filipine ram mi 39, Australia ram mi 2 le New Zealand ram mi 2 an tel ih tutiang ahcun chief officer Eduardo Sareno lawng an runsuak ngah lai.

Gulf Livestock 1

Amah cun, “Ti sung ih ka dawp veten theih tawk suah in ka leuh ih thlihrang tisuar lak ah zo hman ka hmu ṭhiṭha thei lo. Vansiat kan tong le in runsuak karlak ah Lawngpi khal ka hmu lo ih Lawng thlun vetu midang khal ka hmu hai lo” tiah CNN hnen ah a sim.

Tu ah, a hlo mi Gulf Livestock 1 Lawngpi le hnaṭuantu minung 40 luan cu ṭuanvo neitu pawl in an hawl rero lai a si.

ref:CNN,WTpost

Leave a Reply

Your email address will not be published. Required fields are marked *

error: hahahahahaha !!