Mihring taksa tuar thei lo ding khawpin Asia ram ṭhenkhat ah Khua a hlum ding

Thlanglam Asia ram pawl ah voi le khatin khua a hlum ciamco ih Loram thlaicin pawl a siat hlei ah meisa tu le tu a siat leuhleuh.

April 28 sun ah Delhi khawlipi cu 43.5C in a hlum ih tuhlan kum 10 sungih khawhlumbik nipi a si. Gujarat ram lam khalah boruak a hlum luar ruangah Siizung thleng mina an pung ti`n cozah in thu an phuang.

Gujarat ramkulh cozah harhdamzung ṭuanvonei Manoj Aggarwal cun “Khua hlum ruangih damlo besia pawl tuamhlawmnak hrangah a hranten enkol nakding hmun pawl timlam cia dingin Siizung lam thuron kan pe zo. A ra lai tikcucaan ah hi hnakin a hlum lai dingih mina an pung ding” tiah Reuters hnen ah a sim.

Indian Institute of Technology ih Hydroclimatologist Arpita Mondal khalin “zianghman tuah loin fan hnuai ah kan to men khalle a hlum thotho ih thlanhripi a puut thei. Miṭhenkhat hrang ahcun thihnak tiang a thlen rero zo” ti`n a rel ve.

Nikhua le harhdamnak lam thiamsang India Scientist pawl khalin khua hlum thawn pehpar ruangih damlo thei dinhmun ih um mipum billion lenglo an um. Abikin AC hmang thei lo cin le kum upalam hrangah khawruah har za a si. Curuangah Siizung lam timlamnak nei baak lo cu lamziindang hawl ding a har tiah an rel ve.

Pakistan ministry of climate change khalin a mipi pawl ralrin a pe cia ih “Thlatang umlomi Ṭhalpi ah kan thleng cih. Khawhlum a luar ding. Kum 10 sungih khawhlumbik cu a tu ah kan tuar rero” ti`n thu an suah.

“Abikin thlanglam Asia ram a si mi India le Pakistan in khawhlum luar record thar kan tuar rero zo. April thla thok lamin a ṭan zo ih kan mipi pawl an caurau. Daihnem khalah thlanhripi a puut” tiah Pakistan senator Sherry Rehman in a rel ve.

Khawhlum hi 45C hrawng a thlen cun AC hmang thei lo pawl hrangah tuar a har zet zo ih, atu ah nikhua tahtu global weather forecasting organisations ṭhenkhat cun India le Pakistan ah 49C-50C tiang a thleng thei tiah an sim ih, Pakistan ram ah cu zaran khawhlumnak ai in 6C ihsin 8C tiang a kai thei tiah mithiam pawl in an sim sung cia.

Hivek dinhmun a si ruangah Ministry of Health cozah zungpi cun mipi ralrin an pe cia ih cangtheitawkin Leng suak lo dingin le ni sa lakah kor dum hruh lo dingin siseh, a tet tuk lomi hnipuan hruh dingin le tidai tampi in cio dingin mipi hnen ah thu an than a si.

Leave a Reply

Your email address will not be published. Required fields are marked *