Megha Ṭap AwThawm cun India mitthli a tla ter

Nikhat sung a pasal thih thuhla an sim duh lo mi Megha cu Air India Express vanzam cangsualnak ih thi, a pasal Pilot Akhilesh Kumar ruak a hmu tikah a zum thei hrimhrim lo ih “hi pa cu zo saw a si?” ti`n a pasal hnaṭuanpi Pilot pawl cu a rak sut hai.

Akhilesh Kumar cu August 7, Air India Express vanzam cangsualmi ih co-pilot a siih minung 18 thi mi lakah a tel ve. A nupi nau nei nakding thla 1 lawng a duh ruangah August 21 ah a hnaṭuan ihsin colh lak tummi a si.

Naupainak thla 8 kimzo Megha cu a tuar thei lo ding an phang ruangah le nau a pai mi ruat sak in a pasal thi thu an sim lohli lo.

August 8 ah a pasal hnaṭuanpi pilot 200 luan in an inn sungah a ruak an phurlut cu a zum thei hrimhrim lo. “zo saw a si?” ti`n a vun sut cu Pilot pawl khal awsuak in an ṭap thluh.

Megha cun “ka duat te a si lo. siding khal a awmang lo. A nih cu nau kan nei nak ding Nayati siizung ah a um si.” ti`n lu thing phah in voisawmsahra a au.

Mithi tui` uu Vijay in “kan biak netabik cu farnu pawl in an unau pawl kutkhih an bunter ni Raksha Bandhan ah a siih tu ah cun hmaiton in, in biak thei nawnlo. Hivek thil thleng ding cu kan zum thei hrimhrim lo” a ti.

Megan cu an pai` ruak ur dingih an pok suak lawngah mangsia man ih ṭhang dukdi bangin a harh puppi ih “kan naute teh ziang tin saw ka sim fiang ding, kan innsung ah thimzing a tlung” ti`n aw suak in a ṭap theisaal ih innsung um hmuhhmuh cu lukuun in an mitthli a dok thluh. Cutin sianglo cing ten Pilot Akhilesh Kumar ruak cu an vui.

Air India Express Flight 1344 cu covid 19 boruak ruangah ramdang ih tang, India ram mi pawl va phurtu a siih Akhilesh pa cun “ka fapa in ram hrang ah nunnak pek in Covid 19 ral a do. India ram in Paralṭha pakhat kan can ta” a ti.

Leave a Reply

Your email address will not be published. Required fields are marked *