March 4 : Pu Trump ṭantu ṭhenkhat in Capitol Innpi siim tum sal in cangvainak nei

US President hlun Donald Trump ṭantu ṭhenkhat in March 4 ah US Capitol innpi an siim tum lala tiah U.S. House Committee on Armed Services ih chairman Adam Smith in CBS hnen ah a sim.

Buainak tawthawk tumtu pawl cu March 4 ah Donald Trump cu US President lal lukhuh an khum terding timi zumnak neitu Conspiracies zumnak fehpitu Sovereign Citizens Movement, QAnon conspiracy zumnak thluntu le Pu Trump lamṭang miṭhenkhat pawl an siih online in nasaten an cangvai tiah US media ṭhenkhat in an tarlang.

Hivek thuthang a suak ruangah 46th nak U.S. President thukam neih ṭum boruak ih humhimnak ṭuanvo latu National Guard troops ralkap 4,900 cu March 12 tiang Washington DC khuapi kilhim dingin US Capitol palik in US cozah hnen ah a dil.

U.S. House Committee on Armed Services chairman Adam Smith cun “Pungkhawmaw in Capitol innpi cu March 4 ah kan siim ding tiah timtuahnak an nei khal a si men thei. Cumivek sawmawknak cu online ah hmuh ding a tam zet.”

“Nan, hivek thuleng cu tuhlan khalah online ah hmuhding a tam zet ih a cangsuak taktak ding tinak cu a si hran lo. Asinan, in bawm duhtu nan um ahcun cangvaihnak nei hai lo dingin in simsak thei ih US rampi hrilawknak cu kan ṭheh felfel zo. Joe Biden in a neh tiah in simsak thei” ti`n defence officials hnen ah a sim.

US rampi ah buainak a suak sal thei timi thuthawn pehpar in Pentagon official khalin “US Capitol palikpi dilnak vekin National Guard troops ralkap 5000 hrawng thawn khuapi kilhimnak hrang hmalaknak kan nei a si” tiah thuthannak an nei.

Siarbet :

Sovereign Citizen Movement
An nih hi US cozahpi in ralhraang ṭihnung cangvaihnak pakhat vekih a zoh mi mibur an si. An zumnak hrampi pakhat cu US Daanhrampi 1871 act hin US rampi cu corporation kut sung ah a thlenter ti hi a si.

Curuangah cuih kum hnu ih US President hriltlin thar hmuahhmuah cu (voi 19 nak US rampi President Rutherford B. Hayes telin) US rampi President dik ah an pom duh lo hlei ah US Daanhrampi ih Uk mi ah kan telve lo an ti. Cuihtlun ah 1933 kum ah President Franklin D. Roosevelt in Gold Standard timi Ukawdan a titawp ih, cumi ai ah US mipi cu foreign investor pawl hnen ah a zuar thluh tiah zumnak an nei.

Tukhalah Donald Trump cu voi 19nak US President thar dinhmun in March 4 ah lal lukhuh a khum ding ti`n online ah an au.

QAnon in March 4 thleng ding an hngakhlap
An nih hi a dik lomi le rin tlak loih ruahmi hram mumal neilo, politic lam luan tuk ih phiarsawmnak rin dan (far-right conspiracy theory) suahpitu an si.

Liberal Hollywood lemcangthiam le Democratic politician pawl cu setan biak an si ih nonal nunsau dingin nauhak thisen an in ringring tiah zumnak an nei.

Cuihtlunah Leitlunhuap nauhak zuarnak (nupa sinak hmanpi le an sa ei dingin) pawlkom lakih telve an si tiah zumnak an nei ih cupawl cun Pu Trump an phiarsawm ti`n an zum.

Cuih setan biak pawl ih phiarsawmnak cu January 20 ihsin US President ṭuan pehzom tuding Pu Trump in a neh neknek leh ding tiah zumnak an rak nei.

Asinan, tuah, an rak aupimi pawl cu Pu Trump a tlasia ruangah a takin cangsuak theiloding dinhmun ah a um. An rak aupimi cangsuak thei ding cun Pu Trump hi President ah an canter a ṭul. Curuangah an zumnak cangsuak thei dingin sovereign citizen movement zumnak an ṭawmpi a si.

QAnon zumnak thluntu website pakhat cun “Kan zumnak a hngetkhoh ṭul. Biden hi kan President dik a si lo. Pu Trump cawlh sungah a langten tohkhamsang ah a to sung men mi a si. Kum 1871 ihsin an rak herkualmi US rampi Ukawknak cu March 4 ah a tawp ding. March 4 ah US President voi 18 nak a simi Ulysses S. Grant hnaṭuan pehzom in Donald Trump in Voi 19 nak US President a ṭuan ding a si” tiah an tarlang.

“QAnon le sovereign citizen movement hi an fehpi mi zumnak a bangawmi khal a um ko. Nan, tuikum January thla hrawng hin QAnon thluntu tamzet cun sovereign citizen movement ruahnak an ṭawmpi thok” tiah conspiracy theory researcher Travis View in a sim.

Leave a Reply

Your email address will not be published. Required fields are marked *

error: hahahahahaha !!