Malaysia cozah kharhkhummi raltlan 500 lenglo an tlansuak ih nauhak telin mi 6 an thi

Malaysia, Penang, Sg Bakap ih kharhkhummi mivai/raltlan Rohingya 500 lenglo cu an khumnak hmun immigration detention centre ihsin April 20 zingpit ah an tlansuak.

Penang le Kedah ramkulhri ih um Sg Bakap temporary detention centre ihsin zinglam nazi 4 hrawngah an tlansuak ih buainak a um ruangah maw, ziangah an tlan timi cu Malaysia palik in an rel ṭha duh lo.

Immigration director-general Khairul Dzaimee Daud cun inn dunglam sangka an boh tiah a rel ih, ramsung media ṭhenkhat cun lungawilonak an nei ruangah duhphorhnak nei in buainak sosang vivo ih an tlansuak mi a si tiah an tarlang.

Tuni, tlawngkai nithum sun hnu tiangih thuthang suak dan ah a tlansuak hi mipum 528 an si ih kaih salmi 357 le nauhak telin mithi 6 an um ti a si. Mithi an um dan belte felfai in thu an suah lo.

Kai hrih lomi mipum 165 an tang lai ih, kharhkhumnak hmun ih buainak a suak thok dan cu Malaysian Human Rights Commission in zirzoinak nei dingin hmalaknak an nei tiah theih a si.

Malaysia cozah hin official in Refugee a cohlang lo nan United Nations High Commissioner for Refugees card neitu pawl cu Malaysia ram ah zalen deuh in an um thei a si.

Leave a Reply

Your email address will not be published. Required fields are marked *