Lushai Hills Residency Hotel ih Mizo fala thih cungcang thu um cin
Mizoram, Aizawl, Lushai Hills Residency Hotel ih Mizo fala thih cungcang cu atufang Mizoram thuthang larbik a si ih ngaihven a hlawh zet.
Mithitu hi Lunglei khuami fala Vanlalhmangaihzuali (kum 30) a si ih exam tuah dingin a tlangvalpa thawn Aizawl, Zarkawt, Lushai Hills Residency Hotel ah an thleng ih April 13 zaan ah nungdam in an hmu netabik.
Amahhi Lunglei, Electric vengmi a si ih power and electricity department ih hnaṭuan si in, amah hnak ih kum 8 upa, a tlangval T. Zodinsanga thawn Aizawl ah exam tuah dingin an feh mi a si.
Good Friday hlan, April 13 ah an hmu netabik ih April 14 zing ihsin a tlangvalpa in hotel sungah a hmu nawn lo hlei ah a pehtlaih thei lo ruangah mihlo dinhmun in April 15 ah report a tuah hnu, a ni 6nak ah thi cia in hotel lobbly ah a ruak an hmusuak.
Mizoram Deputy Inspector General of Police (Headquarters) Lalbiakthanga Khiangte in media hnen a sim dan ah Vanlalhmangaihzuali le a tlangvalpa cu April 13 zaan ah Zu an in nasa ti a si ih, a tlangvalpa a it hnu ah zuali cu amahten Zu a in bet ti a si.
A tlangval T. Zodinsanga cun zaan nazi 10 hrawngah a it that thok vekin a relaw ti a si ih Zuali cu amahten Zu a in bet tiah an sim.
Hotel CCTV an zoh ciang hnu ah hotel lenglam ah a suak bet nawn lo ti`n an nemhnget ih April 14 ah a tlangvalpa in a hawl ciamco nan a hmu thei lo ruangah April 15 ah palik hnen ah report a tuah ti`n Deputy Inspector Lalbiakthanga Khiangte cun a rel.
#Mizoram I The police have taken the woman's boyfriend into custody for further interrogation.#Aizawl https://t.co/EQpBkONeBT
— EastMojo (@EastMojo) April 20, 2022
Zuali ruak cu elevator (dathleka) zawn hotel lobby ah ṭoih zet zo in an hmu ih a hngawng ruh a kiak dan ah elevator sangka ṭhalo in a tla that ding an zum.
Hmin tarlang lomi Vanlalhmangaihzuali thawn sungkhat naivai mipakhat cun “an unau lakah upabik a si ih Zodinsanga thawn an duhawknak kum 7 lai a rei zo. An pahnih in an duhaw zet.”
“Nunau sawn in mipa hnen ah voitamzet neiawk a dil nan a mipa sungte pawl in awmanglozet phuahlam hawlin an el. An duh lo” tiah East Moji hnen ah a sim.
Zuali ruak cu postmortem an tuah lai ih, a sungte pawl cun mahte thimi siloin thuthup dang a um ding an zum deuh a si.
Atlangvalpa cu palik in thusut pehzom vivo dingin an hruai hrih tiah theih a si.
