Linghnin leuhleuh ruangah Kilauea Meisa Tlang a puak

Linghnin leuhleuh ruangah Hawaii tikulh ih um Kilauea meisa Tlang cu December 20, local zaan nazi 9 luan hrawng ah a puak.

Hawaiian Volcano Observatory (HVO) ṭuanvonei pawl in MeisaTlang naivai ih um khuami pawl cu leng suak lo dingin thuthannak an nei.

“Zaan nazi 9:30 hrawng ah a puak ih thim lakah orange rong meisati cu 165 feet sang hrawng ah a kai so. Asinan, meisati pawl cu Halemaumau Crater (MeisaTlang kaa) tawrawn ih tili ah an luang thluh deuh thaw”.

“Vutcaam/kaangvui pawl cu thlipi in a sem ih Kau District ih Wood Valley, Pahala, Naalehu le Ocean View lam ah a tla thei ruangah cuih hmun ih um pawl cu leng suakvak lo ding” tiah HVO cun twitter ah a tarlang.

Hilo tikulh kiang ihsin 4.4 magnitude thacak ling a hnin ruangah MeisaTlang a puakmi siding an zum ih cumi hlan khalah nazi kaar dan in 2.5-2.7 magnitude thacak cu voi 7 hrawng a hnin.

Kilauea meisa Tlang puak netabik cu May 2018 kum ah a siih cuih ṭum ah kiangkap naivai ih inn 700 hrawng a siatsuah a si.

Leave a Reply

Your email address will not be published. Required fields are marked *