Leitlunhuap ram ṭhenkhat ih danglamce Christmas Ni sunglawi hmandan

Leitlun biaknak pawlkom lakih mitambik kan si bangin Christian pawl ih puaipibik pakhat a simi Christmas Ni sunglawi khal hi khat le khat kan hman dan a bangaw lo.

Leitlunhuap biaknak pawlkom tambik cazin – Wikipedia

Christmas nipi kan neih vivo vekin mah le umnak cio ah phur zetih kan hman thei cio nak dingah leitlunhuap ram ṭhenkhat ih Christmas ni sunglawi hman dan danglamce pawl kan zoh tlang hnik pei.

Ukraine
Fale pawl hrang Christmas thingkung ceimawinakding sumsaw neilo nuhmei nu cu Maimon pawl in an zangfah tukih zaan an itthat sungah an inn-hmai ih Christmas thingkung cu mawizet dingin Maimonrang thawn an rak ceimawi sak thluh. (Ukraine Thuanthu)

Curuangah Ukraine ram ih Phunhnam ṭhenkhat cun Maimonrang cu dauṭhatnak ah an ruat ih tuisun tuini tiang Christmas hman/hmuaknak ih Inn, thingkung ceimawinak an nei tikah Maimon rang vek ceimawinak an telh ṭheu a si. Biaknak lam puai tuah ding hrang ih Julian calendar hmangtu ṭhenkhat vekin January ni 7 ih Christmas hmangtu khal an um.

Sweden
1958 kum ah Christmas special programme hrangah Donald Duck le a rualpi pawl in Christmas cibei an lo buk “Kalle Anka och hans vänner önskar God Jul” timi cartoon zuknung tawi cu Tv channel ah zaanlam nazi 3 hrawng ah an thlah.

A hnakum khalah cartoon zuknung tawi cu hlanvek tikcucaan ah an thlah lala. Cutin kum tin deuh thaw an thlah ringring ih Sweden mi miṭhenkhat cun Christmas hmandan ciikhat vekah an ruat lan ta.

Official ih hmanmi cu a si lo nan Christmas ni a kim tikle mitamzet cu cuih zuknung zohkhawm dingin an innsang pawl an pung khawmaw. Himi tikcucaan ah Sweden ram ah cell data hmangtu a hrek zikten an tlaniam ih Emergency phone call khal a hrek zikin a tlaniam ti a si.

Netherlands
December 5 hrawng in nauhak pawl in Christmas ih hruk dingmi an but pawl cu carrot thawn meisa kiang ah an tanta.

Sinterklaas (Mirang pawl ih run cawng lehmi Santa Claus) in but sungah laksawng phunphun a tanta ding timi zumnak an nei ih Sinterklaas tomi Rangraangpi “Amerigo” hrang ah carrot an rak pe ve.

Nu le pa thusim ngai nauhak fel pawl cu Sinterklaas in laksawng phunphun a pe dingih thusim ngailo nauhak pawl cu an but tantami sungah Aalu ṭawt pawl a tanta tiah zumnak an nei.

Norway
Christmas Eve ah thlarau sia le Hmunphiah zam totu Pingpirnu an cangvai ih ziazasia nei pawl cu Pingpirnu in an Hmunphiah thawn a thiar hlo tiah zumnak an nei ruangah Christmas Eve zaan an it hlan ah an Hmunphiah pawl an thup hlo thluh.

Sweden
Sweden ram ah Christmas ih Mee lem tumzet an tuah ṭheu mi cu Mee pahnih hnukmi Leeng totu Thor pathian biaknak thawn a pehpar aw tiah an sim.

Mee lem tumzet an rak tuah thok cu kum 1966, December thla ah a si ih, cuih kum in Mee lem cu kumtin an tuah ih khuasung laili takah an ret ṭheu.

Mihuatsuak pawl in an urkang duh zet ih kilkhawituding khal a hranten an ret ṭheu. Cuticingin an urkang thei thotho ruangah CCTV tiang an rak bun dah. Cuih ṭum khal ah CCTV cu an hack sak ih Mee lempi cu an urkang thotho.

An rak tuahthok kum 1966 ihsin 2020 kum tiangah Mee lem cu voi 36 an urkang zo a si.

Japan
An ram Christmas hmandan cu KFC ei hi a si. Ziangruangah KFC ngelcel an hmang ti`n thusutnak a um ṭheu ih simfiahdan a bangaw lo. Nan, mitamsawn cun Japan ih KFC zuarhmaisabiktu in a arsa kio a khawng theinak dingah Japan mipi a bum ti`n an zum. An sim danvek asile KFC zuartu cun Santa Claus thuamhnaw a hruk ih American pawl ih Christmas rawl tiah au phah in puai hmun ah a thehlar ruangah a hlawh tling tiah an ti.

Rampi pakhat in Christmas ei-inding rori ih ruah mi a si vekin Christmas boruak ah KFC cu nidang aiin let 10 hrawng in an zuar khawng ti a si.

Biaknak dang khalin Christian hrang ih Ni sunglawi Christmas ni cu a phunphun in an rak hmang/hmuak ve. Christian ciocio khalah kan hmandan, kan hmuakdan a bangaw lo. Phunhnam zawngih hmandanbul nei khal an um ih a tlangpin December 25 cu in runtu naute Jesuh pianni Christmas Ni sunglawi tiih pommi a si.

Hram : insider

Leave a Reply

Your email address will not be published. Required fields are marked *