Leiba ruul nak ding ah ka Kaileng ka zuar – Sabzar

Covid 19 ruangih tlaksiatnak rapthlak tongtu a ninii in an pung vivo ih India, Jammu and Kashmir ih um Sabzar Ahmad Khan khal Covid hmual tuar ve in leiba thawn a to ruangah, rulhsalnakding hrang ah a Kaileng a zuar.

India ram ah hin mah taksa zuar hi Daan kalh a si nan beidong pittawp ah Ahmad Khan cun a Kaileng a zuar thu cu local thuthang ah a thehlarter.

“‘Ka Kaileng ka zuar’ Covid boruak ah tlaksiatnak ka tong ih ka neihsiah hmuahhmuah zuar thluh cingin Rs 90 lakh (Kyat 165,983,484.69) leiba ka nei. Curuangah leiba rulhnakding ah ka Kaileng ka zuar ih a duhtu cun in pehtleih thei ringring” ti`n nitin thuthang suak cahmaikhat ah a thehlar a si.

Amah cu motor zuar hnaṭuan a si ih 2019 kum ah nupi a nei. Tu ah a nupi, a nu le pa, a unau pahnih thawn Kashmir ah an khawsa.

Ahmad Khan cun “Kei mah cu kum 28 mi ka si ih kan innsang ah mi paruk kan um. Motor thawn pehparmi hnaṭuan ka si vekin Bank lam thawn khal pehparawknak kan nei ih Bank ah Rs 61 lakh (kyat 112499917.40) leiba ka nei. Bulpak in customer pawl hnen ah Rs 30 lakh (55327828.23) leiba ka nei.”

“Tu ah, Covid boruak ah ka hnaṭuannak cu atlasia ih hnaṭuan khal ka nei nawnlo. Ka leiba pawl khal ka pe thei nawn lo. Curuangah, India Daan thawn a kalhaw ti thei cingin ka Kaileng ka zuar nak san a si”.

“Ka sungte pawl thawn caan reizet relkhawmnak kan nei hnu ah thuthluknak kan tuahmi a si. Leiba ka neih nak pawl ka ton ngamlo ruangah inn ah ka relh ringring. Nitin kan ei-in ding cu ka naute pahnih nica hlawh kan ring.” a ti.

Amad Khan thuthawn pehpar in a Kaileng lei duhtu an um zo le zolo thu, TOI in a sut tik ah “Tuini khal ah Lei duhtu mipakhat in, in pehtlaih. Nan, a ngam zat cu Rs 20 lakh (kyat 36885218.82) a si. Kan dung ih in biaktu khal in Rs 25 lakh (kyat 46106523.52) in ka ngam a ti. Ka leiba cu a deih lo nan….” tiah a sim ih lungzur mitthlitlak in a ṭong a ti tawp.

India ram ah hin Covid 19 ruangih tlaksiatnak tongtu an tam zet ih harsatnak ruangih thlaiaw that khal an tamzet a si.

Leave a Reply

Your email address will not be published. Required fields are marked *