Lamzin ih feh men cu naam thawn a Ke an sat bul

Vietnam khawpi a si mi Hanoi khua lamzin par ih vak men mipakhat cu hmel lang lo hnipuan dum hruk mipakhat in a dunglam ihsin naam thawn a Ke a sat bul.

Hmin tarlang lomi naam sat tuar cu kan dung tlawngkai ninga, zaanlam nazi 5 hrawngah Hong Van veng ah a vak ih, Lu ihsin Ke zim tiang tuamawthluh mipakhat in naam thawn a vorhlam Ke a sat sak.

Lamzin ah a tluk ih ziang a cang ti a thei lawk lo. A dunglam a zoh ih naam keng mipakhat cu a tlan cih. Cuhnu ah a vun lawng ih awk mi a Ke cu a hmufiang ih kaingkap pawl bawm dilin a au.

Caan tawkmawi rei hnu ah palik an thleng ih siizung lam ah panpi cih in an tuamhlawm. Amahcu vanṭhatthlak zetin a nunnak a him nan a Ke cu a bul sawhsawh si ko.

Naam sattu hi zo a si ih ziang ruangah rapthlak zetin mi a sat timi cu theih fiang a si lo nan, hriamputu thawn naivaitu mipakhat cun phuba lak duh ah an sat mi siding a zum thu a rel.

Asancu naam sat tuartu cu daankalh cangvaihnak khawvel ih tlangleng a si ih Hanoi khua paisa thaap leknak thawn pehpartu a si ruangah a si.

Daankalh leknak khawvel ah rapthlak zetih thahawknak a um thei zet ih, atu thil cang thawn pehpar in naam thawn mi sattu cu palik in an hawl hlei ah daan lo ih leknak tuahtu pawl khal kai dingin thu an suah cih a si.

Leave a Reply

Your email address will not be published. Required fields are marked *