Kum 50 luan hnu ah Zodiac Killer ih Ca thup nganmi An Let Suak

Code (a dang can-ai ih nganmi ṭongfang) thawn pehparmi thiamsang miburkhat cun Kum 50 luan, zohman ih let suak theilomi mithat hmang “Zodiac” serial killer ih thuthup canganmi (cipher) cu an let suak thei thu an phuang.

Northern California ih rak tlangleng Zodiac killer tiih theihlar mithat hmang cu Kum 1960-1970 hrawng ah nasaten a cangvai ih official record ah minung 5 a that tiah tarlang a si nan tuini tiang zo a si ti an theilo.

Amah cun minung 37 ka that a ti nan San Francisco Police Department record ahcun mi pasarih a that tum ih mi pahnih an luat ti`n a um.

Zodiac killer ih danglamnak le Leitlun huap ih a hminthannak cu palik tihrim in mi a that mi thuhla cu mizaran ih theithiamlomi code hmang in San Francisco Chronicle newspaper zung ah a kuat ṭheu ruangah a si.

Cangan pangai khal a kuat ṭheu ih code a hman mi ṭhenkhat cu kum 50 luan sung an zingzoi nan zohman in an let thei lo. Cuih code cu “340 cipher” tiah an ko.

Tu ah, 340 cipher tiih koh mi Zodiac killer ih cakuat code cu Australia rammi Sam Blake, Belgium rammi Jarl Van Eycke le US rammi David Oranchak in kan let suak thei tiah an phuang.

Code lam thiamsang mipathum ih hmuhsuahmi cu FBI kutsungah an kuat suak zo ih FBI cun “Zodiac killer ih nganmi thuthup cakuat cu miṭhenkhat in an let suak tiah kan thei. Zodiac killer cu Northern California ih um pawl rak buaihnawhtu a si. Tikcucaan a rei zet zo nan a rak that dah mi pawl hrang ah tuini tiang thuṭhennak dik neisuak thei dingin hmalaknak kan nei rero lai a si” ti`n Twitter ah an ngan.

Zodiac killer code kan let suak an timi cu “Kaih dingin in hawl nakah nan buai nasading ka zum. Kaihkhih hnu, gas chamber sungih thih ding ka ṭih lo. Asancu paradise ih in thlen zamrang sawntuding a si. Cuih hmun ah ka hrang ih hnaṭuantuding Sal tawkmawi ka nei zo” ti a si ih a mithat mi pawl cu a thih hnu ah a Sal ih cang dingin an rak hngak ṭhepṭhep zo timi zumnaknei vekin a ngan mi a si.

Ca nganmi thawn pehpar in Zodiac killer cipher rak let tumtu Virginia ih um Web designer Oranchak cun “zo a si timi thawn pehpar in ziang ca hran khal a tel lo. A hlan ih a ngan mi vek thotho a si. Mi theihlar sin dingin a ngan mi a si” a ti.

Zodiac Killer cu a cakuat kip ah Zodiac sign a tarlang

Zodiac killer in newspaper zungih ca a kuat hmaisabik ṭum cu August 1, 1969 kum ah a siih cuih ṭum ah Vallejo Times Herald, San Francisco Chronicle, The San Francisco Examiner hnen pawl ah ca bangaw pakhat fingfing a kuat.

Ca sungah mizaran ih theithaim lomi 408-symbol cryptogram khal a tel cih. Cumi sungah zo ka si timi a tel tiah a ngan ih cuih ca cu thuthang ah print suak cih dingin a dil cih. “Zinglam thuthang suahmi ah nan print tello a si le weekend zaan ah malawng um ka hmumi pohpoh ka that thluh ding” a ti tiah wikipedia ah an ngan.

Zodiac killer ih cathup nganmi Cipher cu tuhlan khal ah California ih Tlawngsaya nupate in an rak letsuak dah zo.

Cumi cu Zodiac killer in 1969 kum ah Vallejo Times-Herald newspapers hnen ih a kuat mi a siih “Zodiac killer 408 Cipher” tiah an ko.

408 Cipher cu “Mithat hi ka paih hrimhrim a nuam ka ti tuk” tiah California ih Tlawngsaya nupate in an rak letsuak a si.

Zodiac Killer thuanthu cu ngaihventu a nei tamzet. Youtube ah a thuanthu hmuhding a tamzet ih Cabu le zuknung khalin an suah. Clint Eastwood ih cangmi 1971 kum suak “Dirty Harry” le Kum 2007 ih suah mi “Zodiac” zuknung khal a mai thuanthu an cangsalmi a si.

Leave a Reply

Your email address will not be published. Required fields are marked *