Kum 25 mi in Naute Phir 9 hringsuak cu Leitlun mipi mangbang thluh

Leitlun fimthiamnak ih ruahban loding khawpin minung taksa hi amak danglam ih kan taksa pengtinkim sungih technology hmuhbanlo thildang tampi a um lai.

Cuvek thimak danglam tamzet lakih mipi mangbangter zettu pakhat cu West Africa, Mali ram ih naute phir9 neitu`i thu hi a si.

Kum 25 mi Halima Cisse cun naute phir 9 rori a nei. Ultrasound an lak lai ahcun phir 7 lawng a lang ih a hringsuak taktak cu phir 9 an rak si.

Mali ram ih Ultrasound an lak ahcun Dr pawl in nau phir 7 lawng an hmu. Kum 25 mi rori ih naute phir 7 pai cu amak danglam tukih West African cozah rori khalin a buaipi/ngaihven phah thluh.

A kum le nauhak lai thawn nau 7 rori pai cu ti`n rampi hruaitu Bah Ndaw in Morocco ram ih Siizung ṭha ah zohkhen dingin March thla ahkhan a tawlrel sak ih Morocco ram ah nunau 5 le mipa 4 tlungten a va nei suak.

Mali ram Health Minister Fanta Siby cun “naute pawl khal an ṭha, naute nu khal tuhrihtiang ahcun a dam cak zet. Nau nei dingih thluntu kan ram doctor pawl in an zohkhen. Zarh khat-hnih hnu ah an ra kir sal ding” tiah AFP hnen ah a sim.

Morocco ram Health ministry ṭuanvonei Rachid Koudhari cun North African ramsung siizung pawl ah hivek thil thleng a um ti kan thei lo tiah a sim lawk nan neta hnu ah a nu khal naute pawl khal an damcak a ti sal ih Morocco ram Minister of Health and Social Development aiawhin “an sungten damcakin nunsau hram hai seh” a ti.

Nau phir 2 hman hi naupai ṭhenkhat cun neih a har zet tiah an sim ih kum 25 mi rori`n damcak zetin nau phir 9 a hring suak cu a theitu a ti mangbang thluh a si.

Leave a Reply

Your email address will not be published. Required fields are marked *