Khuai ṭihnung tuk mi US ram ah a thleng, A bu an Ṭhiatbal cih

US ram ih um dah kel lo mi Khuaingal cikhat (Asian giant hornet or murder hornet) cu scientists pawl in caan tawk mawi an hawl hnu ah Canada ramri ih Blaine khua ah a bu an hmusuak ih an ṭhiatbal cih.

Murder hornet Khuai cu China, Japan, Thailand, South Korea, Vietnam le Asian ram ṭhenkhat lawng ih um mi an si nan mangbang thlak zet in North America continent ah 2019 kum cem lam in an hmu thok.

Tutiang ahcun North America khal ah Canada le US ramsung hmun malte lawng ah an hmusuak lai. 2020 kum lailak hrawngah Washington state sung ih Khuaingal apak ih hmusuak a si hnu in Scientist pawl in a bu an hawl thok ih Canada ramri ih um Blaine khua ah an hmusuak.

Hih thu thawn pehpar in insects nuntukhawsakdan zirzoitu entomologist thiam sang Christina M. cun “US ramsung ih hmuh hmaisabik mi murder hornet Khuai bu a si. Khuai ṭihnungbik lak ih siar tel cih mi an si ih Asia ram lawng ih um tlang pi an si nan ziangtin US ramsung ah an thleng thei timi kan thei lo” a ti.

Murder hornet Khuai cu 2 inches (5 centimeters) hrawng an sau ih a cak/ṭihnung zet mi tur an phut thei ruangah minung hrang khal ih ṭihnung zet mi an si. Asia ramsung ah Kum 1 sungah Murder hornet Khuai in minung 50 zik a hen/keu that. Cuhleiah enviroment hrang ih thupi zet mi Thlaai karh tertu Khuai fate (Honeybees) thattu an si.

Christina M. cun “Khuaingal pawl cun Khuai fate hawl in an that ringring. Khuaingal rual in Honeybees colony khat cu nazi kaar sungah an that ṭhet thei. Curuangah Thlaai karh tertu Honeybees cimit ter theitu an si ruangah US ramsung ih um ding a rem thiam lo” a ti.

Scientist pawl ih hmusuak mi Blaine khua ih Khuaingal bu cu October 24 ni ah an ṭhiatbal ih bu an sak nak thingkung khal an hau cih.

Murder hornet Khuai pawl cu an mi hen nak zang a sau ih Khuai siim nak kawr menmen khal an hen tlang thei ruangah a bu ṭhiat dingah thuamhna ṭha cii hruh in an ṭhiatbal a si.

Leave a Reply

Your email address will not be published. Required fields are marked *