Kawlram ih mi bum tu ding Phone scam zirhtu pawl an kai

Thailand, Chiangmai, San Sai district ah hnaṭuan nei lo pawl mi bum dan zirhtu zung pakhat cu Thailand palik in an luhcilh ih mi 7 an kai.

An luhcilhmi innpi cu dot 3 a si ih China rammi mipakhat in scam call center hrang ah a hlang mi innpi a si.

Chiang Mai thuṭhenzung siannak thawn Thailand palik 20 hrawngin an luhcilh ih computer hmai ih hnaṭuan rerotu Thailand rammi nunau 5 le China rammi mipahnih an kai.

Thailand palik ṭuanvonei mipakhat in “mi bum dan zirhnak Tlawnginn pakhat vek deuh khi a si. Computer 10 lenglo ah hnaṭuan sawmnak ca post mi kan hmu.”

“Hnaṭuan diltu pawl cu Chiang Mai ah hnaṭuan dan zirh an tum ih, an hnaṭuan nak ding cu Myanmar ram ah a si. Myanmar ram ih um China rammi le Thailand rammi an bat tum ih paisa an bum ngah mi pawl kha an hnen ah direct transfer dingin an fial” tiah a ti.

Hivek bumawknak hi pulhnat boruak hrawngin a tam cuang ih atu an luhcilhnak kiangkap khal ah mibum hmang pawlkom dangdang an um bet ding an zum a si.

Leave a Reply

Your email address will not be published. Required fields are marked *