Kan vuiliam hnu khalah ka Nu thih thu ka Pa kan sim ngam lo

India : Srinagar, Kashmir ih um kum 23 mi tlangval Umer Farooq cu zarhkhat hlan ah a nuntukhawsakdan a lingbalailet thluh.

April 20 ah a nu Haseena Bhat (kum 53) cu Covid a positive. Anu rualin a pa Farooq Ahmad Bhat (kum 63) le a nau Wasee Ullah Bhat (kum 28) khal an positive.

Tuhlan ih hrisel zet Haseena Bhat cu ni 6 hnu ah Covid nat thawn a fapa Umer ṭang hlum ah a thi. Culaiah a pa Farooq cun a nupi thih thu a theilo. Amah cu Siizung ah tuamhlawm in a um ve.

“April 20 ih Covid positive thu kan thei cu naute bangin ka pa lungkuai thinhar in a ṭap. Kashmir ih covid mina dinhmun sia le harsatnak pawl cun at thei ding khawpin kan zate lung sungah ṭihphannak a suak ter. Ka pa cun ka nu a sehreh cuang” ti`n Srinagar ih Islamia College kailai Umer cun a ti.

Athok ahcun innsang ngaihtuah in Covid nat nei le neilo khal a test aw ngam lo. Aneih pang cun thinhar vansang in a sungte a zohkhen thei lo ding a phang. Netahnu ah test lo theihlo dinhmun ih a um ruangah a test sal nan, vanṭhatthlak zetin a negative.

Umer nu Haseena cu a positive hnu nihnihnak in a thawthawt a har thok ih thawsam phahphah in a um.

“Ka nu cu rinlopin thaw ṭha thei loin a um ih a ṭong theilo hlei ah a cang theilo. Siivai lam theilo bepbep kan si tikah kan rualpa doctor pakhat ka phone ih Siizung lut in fial. Cozah siizungah kan nu cu kan phur”.

“Siizung kan lut cu mina a phul in an phul. Siizung sung ih thinhar helhkam mithmai nei hlir ka hmu cu ka lung cii a mit thluh. Aṭhia rorin ka ṭhia ih khuasiksem khal a suak thluh”.

“Ka nu cu thawsam in a um ih Siizung kan thleng veten a thawthawt oxygen level kan zoh tikah 75-80 karlak ah kaiṭum2 in a um (level 95 hi a him tiih ruahmi a si. Level 80 tang cu Thluak hrang ah a ṭihnung zet). Siizung hnaṭuan pawl hnen ah Oxygen thluah dingin ka dil nan Daan an nei cia vekin ngankhumṭulmi form ka ngan khum hmasa” tiah Umar cun a ti.

Siizung ah mina le lutsuak an tamtuk tikah form ngan khum hi minute 30 hrawng rei a ṭul. Culaiah Umer nu` oxygen level cu a ṭum zutzo.

Nurse pawl in test ṭulmi le x-ray an lak hnu ah Umer nu cu pneumonia nei Covid mina retnak ah ret a ṭul ding thu Umer hnen ah an sim.

Doctor pawl cun Sii pek ṭul tikcu ah nurse pawl an ra ding tiah an sim ta nan rat ti an neilo ih Umer in a va pan hnu lawng ah nurse pawl an thleng fang.

“Doctor pawl ih sim vekin a tikcu caan ah Sii an ra dawt. Siidawt caan kim tinten a ṭul vekin cangvai thei dingin ka nu cu leng ka suah san” tiah Umer cun a ti.

Athaizing in Umer nu cu dinhmun ṭha loin a um thok ih theih fiang theilo le san neilo mi a ṭong ciamco thok.

“Athluak ah virus lut siding tiah ka ruat. Nan, doctor cun oxygen level mal mina cu lungmol in an um ṭheu a ti”.

Nikhat ah Covid nat nei thar minung 3000 le mithi 25 umnak Kashmir cu Siizung ah mina an khat thluh ih hnaṭuantu an daihaw nawnlo.

Siizung hnaṭuantu deihawlo ruangah nurse pawl in mina ṭhiṭhaten an zoh theilo. Curuangah Umer cun ṭul caan ih nurse ko dingin le Oxygen cylinder ṭul hai dan vekin phursukso dingah nihnih-thum sung a nu kiang in a kil ringring.

Culaiah inn lam ih um a pa cu dinhmun ṭha loin a um ih a thaw a sam thok. Umer cu Siizung lam seherh phah cingten inn lam ah leu in a pa cu Siizung ah a hruai ve. Siizung ah Oxygen cylinder an vuah veten apa dinhmun cu a zia um deuh.

Nan, April 25 ahcun Umer nu Haseena ih oxygen level cu phan ding um khopin a ṭum suk. Cuihcaan ahcun level 65 ah a ṭum.

“Doctor pakhat cun Covid nat in pneumonia a suahter cun mina ziang a cang ding ti sim cia a theih lo in ti. Cuvek dinhmun mina tamsawn cu an nung dam thei lo a ti. Doctor simmi cun ka taksa peng tinkim ah ṭihphannak a darhter thluh” tiah Umer cun a sim ih “ka nu kiangkap ih um mina tamzet cun damṭhazet an bang nan minute 1-2 sung ah thawsam in an thi cupco” a ti.

Umer cun damcak in inn kan tlung thei leh ding tiah a nu a hnem phah rero nan a oxygen level cu a ṭum suk vivo. Culaiah, a umnak kiang ih ra vaak mipahnih cun Siizung ih oxygen a cem faifilik zik thu an rel mi cu Umer in a vun thei.

“Oxygen hiip ding a um ruangah ka nu a nung ceuceu. Culaiah Oxygen a cem zik thu an rel mi ka theih cu ṭek tlak ngah mi vekin ka thei aw. Oxygen cylinder retnak ah ka va tlan ih dur hnih ka ngah thei ceu” a ti. Nan, cuih oxygen dur cun nazi 2 hman a deih lo ding.

“Oxygen cylinder ngah theih ding hi thil olai a si lo. Siizung hnaṭuan pawl hnen ah hramhram in zangfah dil ṭul. Zum dingin ka nu dinhmuh simfiah a ṭul ih doctor nganmi report khal hmuh a ṭul” tiah Umer cun a ti.

Report ih ngan mivek a si le mipum 7 million umnak Kashmir ah ventilator 93 lawng a um. Srinagar ah minute 1 sungah 13,000 litres lawng oxygen lakding/suak a um. Cumicu tui dinhmun ih ṭulheimi oxygen thawn tahṭhim cun ziang titham khal a si lo.

Umer cun “Oxygen dur (cylinders) ka ngahmi pakhat cu on a theih lo. Ka nu thluhmi oxygen le a cem zutzo. Thinphang in oxygen ong theituding ka hawl ih minute 15 hnu lawngah a tuahthiam ka hmu fang” a ti.

Anetnak oxygen cem zutzomi lawng an nei thlang tikah Umer cun a dang a va hawl sal nan pakhat hman a um nawn lo. Arualpi le sungkhat a phone kual ih a rualpa pakhat in NGO hnen ta Oxygen dur 1 Rs. 50 ih lei theih mi a hmu sak.

Umer cun “Siizung ah oxygen bur hnih rak kuat dingin ka rualpa ka fial. Culaitak cu zinglam nazi 3 hrawng a si” a ti. Zinglam nazi 6 hrawng ahcun a nu a cat zik cuahco. NGO hnen ah oxygen dang lei bet dingin a rual le pawl a phone hai nan Siizung an thleng man hlan ah Umer nu Haseena cu a rak catthla zo.

“Ka nu cu April 26 zinglam nazi 8;10 ah ka ṭang sungah a nunnak a cem. Ka hrang ih mi thupibik, ka tum tahmi hmuahhmuah lung tluangten i dinpi ringringtu ka nu cu Siizung itkhunpar, ka ṭang hlum ah a nunnak a cem. Cumicu a hrang ah oxygen kan tawlrel theilo ruangah a si” a ti.

Zinglam nazi 9 hrawngah Umer nu` ruak cu siizung ihsin an suah pi. “Keimah le ka sungkhat 10 lawngin ka nui` ruak cu kan vuai liam. Culaiah ka pa cu ka nu thih thu kan sim ngam hrih lo” tiah Umer cun a ti.

Umer pa cu oxygen umnak hawl vivo in Srinagar Siizung dang ah an ṭhawn, Culaiah Umer nau Wasee cu ṭhatlam pan vivo in a nu zuun ngai in a um ih, a nu ruak hmu ta man lo, tuarna lungkuai in Siizung ah a ṭap.

Leave a Reply

Your email address will not be published. Required fields are marked *