Kan ram ah US Tourists lut kan duh lo

U.S. Arizona thawn ramri awmi, Mexico, Sonoyta ramkulh mipi pawl cun Covid – 19 nat karhzai cuangnak U.S. ram, mipi pawl, an ram Mexico ih lut theilo dingin kham dan an tawlrel a si.

US tourist pawl in cawlhahdam nakih an hman ṭheu mi Mexico, Puerto Peñasco tipi kap fehnak ziin ihsin Sonoyta ramkulh mipi pawl in an ram ah US tourist pawl lut theilo dingin an kham mi a siih mah le innsang motor suah cio in lamziin an kham.

Puerto Peñasco beach

Sonoyta mayor, José Ramos Arzate cun, “US tourist pawl kan ram ih lutlo dingin kan sawm hramhram a si. Natnak karhzai cakzetnak U.S. Arizona ramkulh ihsin kan ram sungih nathrih lutlo dingin khawtlaang hrahdam theinak dingah lungrual ten thuthluknak kan tuah mi a si.”

Sonora ramkulh harhdamnak ṭuanvonei Enrique Clausen khalin, “Covid – 19 karhzailo dingin le khawtlang mipi harhdamnak ngaihsak in cangvaih a ṭul. Tufang ih kan tuah ṭul bikmi cu US lam ihsin Mexico ram ih lut tumtu kilkhawi hi a si” tiin tuhlan thla 1 hrawng ah a rak sim dah.

U.S tourist pawl lutlo dingih motor thawn rak khamtu pawl lakih telve mipakhat cun, “Pu Trump in Mexico ihsin riittheihsii, daan loin US ah hnaṭuan dingih luttu le nathrik siava pawl US ah lutter ka duhlo tiin hruang sangzet a sak. Kan nih khal US ih karhzai cakzetmi pulhnat hrik paitu pawl kan ram ih lut ding kan duh velo ruangah hivekin lamziin kan kham naksan a si.”

“Tubaite ah hruang vehvai ih a rat ṭum khalah Mexico ih natsiava in US ramri ih um pawl nat a kaai ter thluh tiin a sim ih cuvek ṭhiamṭhiam in kan nih khal US ram ihsin kan ram sungah natsia lutlo dingin kan kham ve a si” tiin a sim.

US ramri ih um Mexico mipi pawl ih motor thawn lamziin khamnak cu Mexico cozah in a fial ruangih tuahmi a si lo. Kiangkap ih um khawsung mipi pawl in khawtlang himdam theinak ding ruahsan in an tuah mi a si.

Tuah, Mexico ram ah Covid – 19 nathrik kaaitu mipum 268000 hrawng an um zo ih cumi lak ihsin mipum 164000 hrawng an damsaal ih mipum 32014 an thi zo a si.

ref:ITA,NSB

Leave a Reply

Your email address will not be published. Required fields are marked *