“Ka nu Tisung ih a pil lai ka hmu” a ti nan tu ni tiang an hawl hmu thei lo

July 8 ihsin hlo thoktu Hollywood lemcang Naya Rivera cu an hmuh netabiknak hmun kiangkap ih palik ṭuanvoneitu pawl in an hawl rero nan tuni tiang an hmu thei hrih lo.

July 8, Tlawngkai ni 3, zaanlamrii ah a fapa Josey Hollis (kum 4) thawn California, Lake Piru tili ah cet laawng to dingin an feh ih cuih hmun ah a hlo mi a si.

A fapa thawn Laawng an hlan mi caankhiah a kim hnu khalah kirsaal ti a um nawnlo ruangah Laawng neitu pawl in zaanlam nazi 4 hrawng in an hawl thok.

Laawng cu an hmusaal nan a sungah kum 4 mi a fapa Josey Hollis lawng a rak um. ‘A fapa cu nauhak nunhim kawr hruh in a rak um ih a nui` nunhim kawr le a ID pawl cu a kiang ah a rak um’ tiin a hawl hmutu pawl cun an sim.

A fapa Josey Hollis in ‘nunhim kawr hruh loin a nu ti a leuh thu le an to mi laawng umnak thleng thei loin tisung ih a pil thu,’ ṭuanvoneitu pawl hnen ah a sim.

Laawng an to nak Lake Piru tili cu a sunglam titha a cak hlei ah tivirh (tiherh) a suak ṭheu ruangah a ṭihnung zet. Cuhleiah asunglam tidai a nawi ih tileuh ruangih thitu khal an tamzet tiin kiangkap um pawl in an sim.

Palik le ṭuanvoneitu pawl in hawl tiim an tuah cih ih tili kiangkap ah zo hman lutlo dingin an kham. Cangthei tawkin an hawl nan an hmu theilo ruangah July 9 ah a thi zoding an zum thu le mithi ruak hawl vekih hawl an tum thu, palik pawl in official in an phuang.

Tisung lutthiam mipum 100 le tulai technology hmanrua pawl hmangin an hawl nan an hmu theilo. Camera ṭhazet thawn khal tisung ah an hawl nan tidai a nawi ruangah fiangten an hmu theilo. Miruak hawl thiam ramdang mi khal paisa pek in an hlang nan tuni tiang an hawl hmu theilo.

Naya Marie Rivera (kum 33) cu American actress, model, singer a siih, 2015 kum ah actor Ryan Dorsey thawn fapa te an nei. A nauhak lai ihsin hollywood khawvel ih telzomi a si. 2009-2015 ih suak mi Fox television series “Glee” ah Santana Lopez timi hmin thawn a telnak ihsin a hmin a thang thok ih lawmman tamzet dongzotu khal a si.

ref:TheGuardian,wiki

Leave a Reply

Your email address will not be published. Required fields are marked *