Ka fanu unau hnih te, Thin nuamten cawlhahdam caamcin thlang uh – Patricia “Tissie” Owens

Mai` sungsuak fanu pahnih rori thattu, FBI Most Wanted mi pahra lakih telve Yaser Abdel Said cu kum 12 sung rori an hawl hnu ah a relhnak Justin, Texas ah Palik in an kaingaih thu an phuang.

Yaser Abdel Said cu Sinai, Egypt ram ah a piang ih 1983 kum ah Tlawngta visa thawn US ram ah a feh. 1987, kum 30 a si ah Patricia “Tissie” Owens (kum 15) thawn an nei aw ih hell ram innsang an din thok.

Amah hi a hlan ah nupi nei zo a si ih fanu pakhat a nei. Patricia thawn fapa pakhat le fanu pahnih an nei ih 1997 kum ah US ram mi sinak a co.

A fale a control zetih an mai` muslim Daan vekin a fale a ṭhanglian ter tum nan, hnamdaan danglam US ram um an si vekin a fale pahnih (Amina le Sarah) cun zalen zet ih um an duh.

Thinlung sual hrimhrim mi a siih a fale a nupi khal, kut a thlak hai ringring. Taksa pem seksek in tlawng a kai ter ṭheu ih “kan zahmawh khal in sawh sak ṭheu” ti`n a fanu Sarah cun a rualpi pawl hnen ah email a kuat dah.

A fale theiloin video a zuk thup hai ṭheu ih hna an ṭuan nak hmun tivek tiang thlunthup in video a zuk thup hai. A fale a control tuk ih an aw tivek khal a record thup ruangah khawtlang phone khal a fale in an hmang ngam lo.

A fale a hrem dan cu a fa nu Sarah in a rualpi hnen ah email a kuat ih a ngan mi cun milung a zuur ter.

“Ka pa in hlawhhlang vekin in zoh. Kut in thlak ringring ih kan zahmawh tiang in tham sak. Amina kum 16 a kim ah ka pa in Egypt ram ah a hruai ih, kum upa, a mai` rualpi thawn a nei-aw tertum nan Amina in a duh lo.”

“Tlawngkai ṭheh in dawr ah hna ka ṭuan phah ṭheu ih ka hnaṭuan lai khal video in zuk thup ṭheu. Customer na biakdan na mithmai paan tuk tiin hnizuamzi in na um ringring in ti ih zaan khat cu napin in thawi. Cuvek ruangah ka lo that hai ding in ti. In that taktak ding ka zum” tiah Sarah cun a rualpi hnen ah email a kuat.

Amina cu Taekwondo a zir ih cunah hmun ah Joseph Moreno timi tlangval tleirawl thawn an uar awk. Apa a ṭih tuk ih ramleng khual a tlawng sung khalah a tlangval pa a tong ngam lo. “Ka pa in hmaanbilu thawn in bih pang ding” a ti. Phone thawn khal a biak ngam lo. Ca voikhat a kuat mi te cu a pa in a kaingah ih nasaten a hrem. Amina cun ka mitthlam ih um mi men a si a ti nan a pa cun a zum lo ih napin a thawi ruangah a phuangaw thluh.

Cuih ṭum in a tlangvalpa thawn an tlaan thup ding phang in, an umnak inn thawn peng 20 hlat nak Lewisville, Texas ah a ceer pi hai.

Cuih hmun an ṭhawn hnu khalah a hrem hai ringring. An it that lai tivek khal a hur zawng in video a zuk ṭheu. A nupi khal a ui-re san. Fala dang paruk a kop ti`n a nupi Patricia in Palik hnen ah a sim leh.

A sual an celh nawn lo ih an nufa thum ten Oklahoma ah an tlaan thup. Cuih hmun in Patricia in a pasal Yaser Abdel Said cu voikhat te a call pang ih cuih ni thok in ni tinten kirsal dingin a leem hai ringring.

A fale pahnih cun kirsal an duhlo nan Patricia cun “kan kir khalle na pa hnen ah nan um lo ding” ti`n a ti hai ruangah Texas ah an kirsal.

Patricia cun remaw lungrual ten kan um thlang ding ti`n a pasal ih a bum mi cu zum ih a fale cu a kirpi sal. A fale hnen ahcun reilo te lawng kan um ding ih hmundang ah kan nufa thum ten kan ceer ding a ti.

Cutin, a pa hnen ah an um sal ih a pa cun nun thar thinlung thar nei mi bangin Sarah (kum 19) le Amina (kum 18) cu kum thar ni, 1 January 2008 ah rawl ka lo do hai ding a ti ih Texi a mawng mi thawn a suakpi hai.

Zaan khawthim hrawngah 911 emergency hnaṭuan pawl in call an dong ih tleirawl numi pakhat cun “in bawm hram uh, ka thi zik” a ti. 911 Ṭuanvonei pakhat cun “ziang nan cang” tiah a sawn. Numi cun “kapa nih in kap. ka thi zik thlang” a tiih “awi, a tawp hrih lo. ka duh lo, ka duh lo” tin a au ih a aw a tawp. 911 cun “phone na kai lai maw ka ṭong na thei maw? khawinah hmun ah na um” ti`n a sut ih khatlam phone cun mithi zik thawthawt awn lawng a lang.

Ṭuanvonei pawl in Phone call nak zawt in an haawl lai ah Irving, Texas, Omni Mandalay Hotel leng, Texi colhnak hmun in 911 call an dong lala. A hmun an va thleng cu meithal zuunhnih kap tuar Amina le zuunkua kap tuar Sarah ruak an va sar. Mithattu Yaser Abdel Said cu a rak tlanhlo zo.

Cuih ni in Mithat Yaser Abdel Said cu Palik in an hawl thok ih 2014 kum in FBI Most Wanted mi 10 lakah a hmin telh thok in a Lu man ah $100,000 an ben.

Cutin kum 12 sung rori an hawl hnu, 2020 August thlacem ah mithat Yaser Abdel Said, a thuptu a fapa Islam Said le mithattui` uu Yassim Said cu Justin, Texas ah palik in an kai.

Mithi tei` ni, Gail Gattrell cun “Muslim silomi Tlangval thawn an thlunaw ruangah “honour killings” lungput thawn a that hai mi a si” tiah CBS News hnen ah a sim.

Tu ah, Mithat Yaser Abdel Said, a relh danding tawlreltu a fapa le a uu cu palik kut sungah an um ih thuṭhensak dingin hmalaknak an nei rero lai.

Sarah (kum 19) le Amina (kum 18) tei` nu Patricia “Tissie” Owens cun “kum 12 sung, ka Thawpi` ka khawl mi cu tu lawng ah ka Thawsuak thei. Ka fanu duhnungte pahnih, thin nuamten cawlhahdam caamcin thlang uh” tin mitthli tlak phah in a sim.

ref:Wiki,Reddit

An Thuanthu Video Documentary an tuah mi rak thlir ve aw….

Leave a Reply

Your email address will not be published. Required fields are marked *