Ka Dam Sung VANZAM Ka To Nawn Lo Ding – vanzam cangsual nakih telvetu

August 7 zaan, Air India Express vanzam cangsual nakih telvetu Muhammed Junaid (kum 25) cun a hmuhtonmi cangsualnak rapthlak cu Reuters hnen ah a sim ih “ziangtik hman ah Vanzam ka to nawn lo ding” a ti.

Junaid cu accountant dinhmun in Dubai, company pakhat ih hnaṭuan a siih Covid 19 boruak ah hnaṭuan cawl ṭheh a si ruangah a suahnak a nui` ram, India ah a tlung mi a si.

Junaid cun, “tuhlan kum 3 rei ah kan sungkua cawm dingin Dubai ah hnaṭuan dingin ka vaai” a ti.

Junaid cu an inn-sang member 4 cawmtubik a siih a thla hlawh 4,000 dirhams ($1,000) cu thla tin ten India ram ih um a nu le pa a kuat ṭheu.

Junaid cun “Covid 19 boruak ih kan company tlaksiat hnu, May thla ihsin ka boss in thlahlawh hrek lawng in pek ṭheu. Hnaṭuanding umlo ruangah thla 2-3 cawl lawk awla ziangkim ṭhat lam a pan hnu ah kan ṭuan pehzom leh ding ti`n ka boss cun in ti” a ti.

Hnaṭuanding le umlo, paisa le cem vivo ruangah India cozah in ramdang ih um a ram mi pawl kosaalnak program ah dilnak Ca a thehlut ve ih paisa 880 dirhams cem in Air India Express flight IX 1344 cu tlawngkai ninga zaan ah Dubai ihsin a to ve.

Amah cun, “Vanzam sung, a dung tabik tohkham tlar ah ka to ih kan ṭum nak ding Calicut International Airport kan lut zik ihsin nikhua a sia tuk ruangah Vanzam cu a hnin durdo.”

Calicut International Airport runway saulam cu 2,700 m a siih an State sung, Airport 4 pawl lakih runway tawibik a si.

“Kan ṭum nak ding airport kan thleng cu, nikhua sia, runway a ciar thawn, Vanzam ke cun runway a dai zo nan zam tumsaal vekin a speed an ti cak ih a zam suak man hlan ah runway ziin a cem ih kan tla lan ” a ti.

Vanzam cu a tla lan nakah a lai in a tan ih a dunglam totu mipi tamsawn cu an him dam. Junaid cun, “Vanzam ih ka lu ka sawh nak le ka hmur ka keu kuai mi bak lo cu ka ṭha ṭheh. Accident nak hmun ihsin motor thawn ka tlung zo ih, tu ah Covid – 19 natnak check dingin ka hngak rero lai.”

“Vanzam cangsualnak second 15 sung cu ka san sung ih hngih thei nawn lo ding mi tikcucaan a si. Tukhalah ka thin phang a reh thei hrih lo. ka ṭih rori si ko. Vanzam ka to nawn lo ding” ti`n Muhammed Junaid cun Reuters hnen ah a sim.

Air India Express Flight 1344 cu 7 August 2020 ah Dubai ihsin Kozhikode lam pan in a zam ih a ṭum nak Calicut International Airport ah a cangsual ruangah a lai in a tan. Atotu 190 lak ah pilots 2 tel in minung 18 an thi ih mitamzet in hrimhma an tuar a si.

Leave a Reply

Your email address will not be published. Required fields are marked *