K-pop fans le TikTok fans in Pu Trump MualPhoh

US ram hrilawknak hrang ih timlamnak nei rero, Pu Trump ramkhel thusimnak BOK Center, Tulsa, Okla ah zum hnak in a hmun ih vatelpi theitu an mal ih rintlak media ṭhenkhat ih sim vek a si le K-pop fans le TikTok fans pawl ruangah a si, ti a si.

Pu Trump lam ih sawmnak ruang ah le tiket zuar theidan zoh ahcun mipum 1 million hrawng in pungkhawm nakih telpi thei ding ah ruat a si nan, a hmun ih suak thei taktak cu minung 6200 hrawng lawng an si.

Pungkhawm nakih feh ding vekin K-pop fans le TikTok fans pawl in tumtah nei in register nak an nei ih ticket khal tamzet an lei ruangah a hmun ih fehtu an mal naksan a si tiin The New York Times cun a ngan.

Republican political campaigns hrang ih hnaṭuan Steve Schmidt khallin “Kum 16 mi ka fanu le a rualpi pawl khallin tiket 100 luan an nei. America tleirawl pawl ih herhkual na tuar” tiin a sim.

Pu Trump lam cun Covid – 19, BLM cangvaihnak, Media pawl le a mah dodaltu ramkhel pawl an mawhpuh.

K-pop fans le TikTok fans tamsawn cu tleirawl hlir an siih vun rong thleidannak duhlotu, san thar nunphung uartu an si ih vun rong thleidannak thinlung nei, Vun raang pawl lawng cawisang duhtu tiih ruat mi Pu Trump cu an ral tumpi a si ruangah hiti vekih cangvaihnak an nei mi a si.

George Floyd thihnak ihsin a pehzommi buainak khalah, Social media ih vun rong thleidan rim nam hashtag tamzet cu K-pop fans le TikTok fans pawl in BLM hashtag hmangin tihlo tumin cangvaihnak an nei ih an hlawhtling a si.

Leave a Reply

Your email address will not be published. Required fields are marked *