John Wick tiawtu in PM Narendra Modi Twitter account Hack Sak

India Prime Minister Narendra Modi Twitter account cu Sept 3, 2020 zinglamri ah online ih mi bum hmang pawl in an hack sak.

An hack mi Twitter account cu a mai` bulpak website “narendramodi.in” official Twitter account a siih, John Wick ti`h hmin pe aw, Hacker in PM National Relief Fund for COVID-19 hrangah online paisa (cryptocurrency) hlu cio dingin mipi sawmnak ca an thlah sak.

Hacker cun “I appeal to you all to donate generously to PM National Relief Fund for COVID-19. Now India will begin with cryptocurrency.” ti`n @narendramodi_in Twitter official account hmang in ca an thlah ih online paisa (Bitcoin) hlu nakding link khal an ret cih.

Hih thuthawn pehpar in Narendra Modi lam cun Offcial in simfiahnak zianghman an nei hrih lo nan Twitter lam in “Narendra Modi account hmang in daan loih cangvaihnak a um mi kan hmusuak. Tu ahcun kan tuah ṭha zo ih zingzoinak kan nei rero bet a si. Himi bak lo cu, account dang pawl ah buainak dang hranpa a um lo” ti`n ca an thlah.

Tulaifang hi online ih mi bum hmang hacker pawl an cangvai nasa ih July thla khal ah US presidential candidate Joe Biden, US ex-President Barack Obama, billionaire Elon Musk le hminthang dang tamzet twitter account an hack sak ih cryptocurrency bumawknak ah an hmangsak a si.

Bitcoin (cryptocurrency) timi cu online transaction tuah nakih hman theih mi “digital currency” a si. 2009 kum ah “Satoshi Nakamoto” tiih hmin peawtu (mi pakhat maw? pawlkom a si tikhal an thei lo) ih tuah mi a siih Bitcoin 1 ih maan cu $ 9,191.15 hrawng a si.

Leave a Reply

Your email address will not be published. Required fields are marked *