Joe Biden in White House innrangpi pumpihlum a Kholh Fai Tum

US President sileh dingih ruahmi Joe Biden cu US rampi President dinhmun in White House innrangpi sung ih a luh thok hlan ah inn-sung pumpihlum a kholhfai thluh tum tiah General Services Administration ṭuanvonei mipakhat in Politico hnen ah a sim.

President Donald Trump telin White House thawn pehpar awmi ṭuanvonei mipum 40 lenglo in Covid 19 nat an kai ruangah ralrin nakah ti`n tuvekin US President umnak White House innrangpi cu a pumpihlum rorin kholhfai an tum a si.

Pu Trump White House ihsin a suak hnu, Biden lut hlan nazi 5 sungah innrangpi ih room 132 pawl cu kholhfai ṭheh an tum ti a si ih Sangka kerkawm, meisa vannak, itkhuntang, sangka copza tiangin an kholhfai tum a si.

Hih thuthawn pehpar in Joe Biden team ih ṭuanvonei mipakhat cun “Mr Trump administration team ah Covid 19 nat nei an tamtuk ruangah ralring nakah ti`n hmalaknak kan nei tummi a si.”

“Covid 19 nathrik cu hmuntinkim ah a betthei ruangah President umnakding inn, zung sung, sangka copza tvk cu hlanlai ih Khuasia dawi suak thianfainak an nei ṭheu bangin hrutfai thluh a si ding” tiah Mail Online hnen ah a sim.

White House historian Kate Andersen Brower khalin “Pu Trump a suak veten Biden team staff 95 cun bungrua hmuahhmuah an pack thluh dingih Pu Trump ih thil tantami hmuahhmuah thianfai thluh a si ding. Innsung thilri nem deuh pawl cu hlonthluh an si ding.”

“President thar le First Lady in innsung thilri hrang ih an duhmi hmuahhmuah cu secret warehouse ta an hril ding” tiah CNN hnen ah a sim.

Tudinhmun ah US rampi hrilawknak cu result fiangfai in a suak zo tiah simtheihzo dinhmun a si nan Pu Trump cun nehnak cotu tiih ruahmi Joe Biden ih sinakding cu herkual letkirsalter tumin cangvaihnak a nei rero tiah US ramsung media tamzet in an tarlang a si.

Leave a Reply

Your email address will not be published. Required fields are marked *