January ni 20 hlan ah Donald Trump ziang a cang thei? – Dr Run Bik

USA nisuahnak lam tikcu zinglam 3:40 AM ah Congress innpi ih MP pawl hmai ah Vice President Mike Pence cun Nov ni 3,kum 2020 hrilawk ah Joe Biden cun electoral college vote 306 a ngah ih Biden cu President ah le Kamala Harris cu Vice ah hril a si tiin a phuang. Donald Trump le amah Pence cu 232 an ngah a ti.

Hrilawknak verify tifiang dingin January ni 6 ah MP pawl kawh khawm a si. December ni 15 i electoral vote an ngahmi hi Congress (House of Representative le Senate) i nem hnget ding a si i House le Senate I soisel ding I thu pulut an um lawng ah rel sak I vote lak ding a si.

House ih Republican MP 211 ah 120 lai cun Trump ṭanin Nov.no 3 hrilawk kha Democratic pawl i vote an ruk ruangah rel sak siseh an ti. Senate I Republican Senator 50 ah a hmaisa ahcun 12 lai in Trump ṭan in rel sak ding an ti nan meeting lai ih Trump ṭantu pawl ih Capitol (Congress) building i dan lo i an luh ruangah Trump tan i rel a ṭul titu senator 7 lawng ah an cang.

Congress i thu rel hlan ah Trump rak ṭan theu tu Vice President Mike Pence cun “kei cun bulpak in zo hman ka tan lo, American mipi ka ṭan” a ti. Trump hin Congress meeting I chairman tuantu Pence hnenah I cak tir aw a rak tinan Mike Pence cun ka ti thei dingmi a si lo a ti I Trump a thin a heng zet. Senate I Republican hotubik Mitch Mecconnal khalin Nov.no 3 hrilawk kha a dik a si a ti ruangah Trump a lungawi lo.

6-1-2021 ni ah Trump cun Washington White House kiangah amah ṭantu America ram pumpi I si mipi a ko khawm. Cumi ih thu simtu Trump cun kan vote in ruk sak. Ralṭha in um uh. Congress building pi ah feh uh tiin a forh. Capitol innpi an siim.

Himi hnu ah Trump i a forh vek I mipi thong tampi cu American democracy biakinn pulpit Capitol innpi ah an feh. Luh an tum I palik pawl in an kham nan an kham thei lo. Mipi za tam zet cu a sung lamah an lut vivo. Meeting hall I meeting nei lai chairman Mike Pence cu secret service palik pawl in an thup. MP tam zet khal humhimnak ah an relh. Joe Biden cun American democracy nan siat suah. President Trump cu na milai pawl tlung tir aw tiin TV in thu a sim. Trump cun ram nan duhdaw ko. Tlung thluh uh tiin a ngen ve.

Leitlun ram hotu pawl khal in democracy thu i zoh ṭhim tlak an timi USA i hivek a thleng hi poi an ti tuk. Capitol building siimnak ah nunau pakhat cu palik I kah ruangah a thi I, hi mipi lak I tel mi dang 3 khal an natnak a suak ruangah an rung thi.

Washington khawpi ah zan nazi 6 isi a thai zing tiang curfew an phuan phah. Black Lives Matters midum le Mirang mipi rawi sandah piah tum ah hmuah hi capitol building hi palik za tlun in nan kil nan tui ṭum Trump lamtang Mirang pawl sansah piah ah hmuah ziangah palik tam na re lo tiin an mawh thluk aw. MP pawl zanvar an pumkhawm.

Innpi mipi I an siim ruangah House le Senate I meeting cu nazi 3 lai an cawl phah. Cui hnu ah an peh leh. MP an za te 450 tlun cu minute 5 ciar lai thu simnak an ngah. State zawng cun Arizona le Penselvania ah an buai bik. Party line cun an feh nan Republican MP ziang maw zat in Trump tidan pawl an duh lo ruangah Trump I duhzawng Nov.3 hrilawk a dik lo ti tum tu cu an mal law law.

Trump tlun ah ziang tin kut an thlak ding.?
A hmaisa bik ah President Trump hin mi tibuai thei nawn lo ding in Twitter, Facebook le Instagram pawl nazi 24 sung hmang thei nawnlo dingin an phih sak. 25 Amendment Daanpi in Trump hi President ihsin dawi ding I thurelnak tla minister ṭhenkhat in an nei.

Hi Dan hin Vice President ho in President hi damlonak in maw, cu lo le a thinlung a kim lo tiin maw an cawlh tir thei. A cawlh duh lo ahcun House le Senate member ṭhen thum ṭhen hnih in an cawlh tir thei ti a si. Trump hi Biden in Jan.ni 20 ah a thlak dingi himi thlen hlan ni 13 sung te ah Trump hi a huatsuak pang ding ti an phang zet. American ralbawi hotu pawl cu Trump a cawlh hlan te ah ramdang vek do tir thei lo ding in an tiar ti a si.

Trump hin thudang khal ah a mah khinnak ding thubuai a nei tam zet I tlun ah Capitol Building ah mipi a thlah ti I khin an tum ti thu tla a um. Tu netabik ah nikhat sungah Trump hi hnatuan pi a tlak lo tiin White House hnatuan thupi zet mi 4 cun an bansan zo.7-1-2021 ah Trump hin thu a suah I, hrilawknak thu ah a sung a pe cuanglo nan buainak um lo ten January mi 20 ah Joe Biden a kian ding a ti.

Leave a Reply

Your email address will not be published. Required fields are marked *

error: hahahahahaha !!