January 20 : President Donald John Trump caan hman tum dan

US President hlun sithlang dingmi Donald John Trump thlahnak cu January 20 ah United States military facility Joint Base Andrews ah tuah a si ding thu theih a si ih, Cuih puai hrang sawmnak ca zohfeltu Bloomberg media cun zinglam nazi 8 ah an tuah ding tiah a tarlang.

US President thuneihnak hlanaw ni cu January 20 ah tuah ṭheu a si ih 2020 US rampi hrilawknak ih nehnak cotu Joe Biden President sinak hlannak ding khal cu, cuih ni thotho ah buainak phunphun suak thei cingin tuah an tum.

Cuih ni cu tolai President Donald John Trump in a tel tum lo thu January 8 ah a tarlang.

Atel tumlo naksan cu ex-President dinhmun in US Tlangbawi zungpi a suahsan duhlo ruangah a si ti`n a naivai ih hnaṭuan ṭuanvonei mipakhat in US media hnen ah a sim ih President tolai dinhmun in ropi zetin White House a suahsan duh a ti.

“Pu Trump thlahnak cu Prince George County, Maryland ih um United States military facility Joint Base Andrews ah an tuah tum ih cozah ṭuanvonei le President hnaṭuanpi hlun telin Pu Trump lamṭang mizaran khal an sawm, Mikhul cu zinglam nazi 7:15 ah thleng tengteng dingin sawmnak ca ah an ngan ih pawlkomawknak an nei hnu ah Pu Trump cu Air Force One vanzam thawn Florida ah a zam ding” tiah Bloomberg media in a tarlang a si.

US Ralkappi in thlah dan pangai in thlah an tum lo
Pu Trump cun US ralkap telin President thlahdan pangai ih thlahding a beisei tiah thuthang a suak. Cuih thuthawn pehpar in United States Department of Defense ih senior officer pahnih in ralkap thlahawkdan pangai vekin thlah an tum lo thu Atlantic Media, Defenseone hnen ah an namhnget a si.

Leave a Reply

Your email address will not be published. Required fields are marked *