US : January 20 hrang Inauguration rehearsal an tuah lai ah Kangmei suak

January 20 ih tuah dingmi US President thuneihnak hlanaw ni hrang rehearsal an tuah rero lai ah inn neilo pawl buuk saknak hmun in kangmei a suak ruangah ralrin nakah ti`n an cawl ih Capitol innpi ṭhen cu an phit thluh.

Asinan, U.S. Secret Service in mipi hrang ah ṭihnung mi a si lo, Khang hrimmi khal a si lo ih kangmei suak hnu reilote ah meithat pawl in mei an phal lohli thei tiah an tarlang.

Hih thuthawn pehpar in Inauguration rehearsal ih telvetu mipakhat cun “January 6 ih buainak in mipi siseh, cozah lam khal siseh kan lung in rap hrih lai. Curuangah meisakhu a suak veten ralrinnakah ti`n Inauguration rehearsal cu kan cawl lawk. Capitol innṭhen cu lockdown an tuah cih hngalh ih hmun him nakah tlan lohli dingin darkhiing an tum” tiah AQT media hnen ah asim.

Meikang cu Capitol innpi thawn pengkhat zik hlatnak hmun hrawng in a suak ih meisakhu cu Inauguration rehearsal an tuahnak khal in a lang ban. Curuangah buainak suak a si pangah ti`n ralrin nakah  rehearsal an tuah mi cu zaanlam nazi 5 hrawng ah an cawl.

US President thuneihnak hlanaw ni hrang timtuah ti sinnak an nei nakah US President thar ding Joe Biden le VIP mikhual ding pawl an tel lo tiah AP in a tarlang a si.

US President thuneihnak hlanawni cu January 20 sun hnu ah an tuah dingih cuih puai ah tolai US President Donald John Trump a tel thei tumlo a si.

Leave a Reply

Your email address will not be published. Required fields are marked *