Israel le US cozahpi cu Aliens thawn hna an ṭuan tlang?

Kum 30 sung Israel Space Security programme hotu dinhmun ih hna rak ṭuan dah, professor Haim Eshed cun Leitlun science khawvel mipi hmuahhmuah ih theihcakbikmi thuhla cu a rel suak ih kan Leilungpi lenglam ih um Aliens an um taktak a ti.

Israel Security Award voithum rori ngahzotu professor Haim Eshed cun Aliens an um taktak timi thu cu Yediot Aharonot newspaper hnen ah a sim mi a siih “US le Israel ram hi Aliens thawn hnaṭuantlang in pehtlaihawknak nei vekin a rel ih “Mars Leisen thuk sung khal ah Aliens le US cozahpi tongaw thupnak hmunpi a um” a ti.

Cuhleiah, kum 87 mi professor Haim Eshed in “Aliens pawl cun hmuhtonding tlak ah in ruat hrih lo. Fimthiamnak lam ih kan ṭhangso hlan lo cu Leitlun mipi hmai ah an pho langaw duh lo ding. Fimthiamnak kan tlasam hrih ruangah a thupthiar in an um hrih” tiah a sim ih “tong dingin kan man hrihlo ruangah thuthup dinhmun in an thuhla thup a si hrih” a ti.

Ziangtikin Leilung dang ih um Aliens le Leitlun um minung, a thupthiar in pehtlaihawknak an nei thok timi cu a rel fiang lo nan Donald Trump president term sungah voikhatnak pehtleihawknak nei thok vek in a rel a si.

US cozahpi le Aliens pehtlaihawknak an nei timi zumnak cu tuhlan kum rei zetzo in a rak um thok zo ih Barack Obama khalin US president a rak ṭuan lai ah Aliens thuthawn pehpar mi cu NASA hnen ah a rak sut dah zo.

Cuih thuthawn pehpar mi cu kan dung November thla ih tuah mi The Late Show With Stephen Colbert TV show ah kaihruaitu in sutciangnak a nei ih Barack Obama cun “Aliens an um ngai le ngailo ka sut ciang ko” a ti.

TV show kaihruaitu Colbert cun Obama ṭong peh ding hngakhlap zetin “cule, cule ziangtin?” tiah a sut nan Obama cun “sorry” a ti ih a ṭongpeh duh lo.

Obama in Aliens thuthawn pehpar mi thuthup a theiciang nan a relsuak duhlo ticu a fiang zet ih The Late Show With Stephen Colbert Tv show kaihruaitu Stephen Colbert cun “na ṭong duhlomi cu ‘an um taktak’ ti`n ka pom mei” a ti ih “Aliens umlo taktak sehla cu an umlo tiah a sim ding nan si khawh” tiah a ti.

Leave a Reply

Your email address will not be published. Required fields are marked *