“Iran ram in Nuclear a tuah thup” timi Thubuai

July 2 zinglam ah Iran, Tehran khua kiangkap in puakkuainak voi 2 a suak ih Iran offcial cun accident a si tiin an phuang.

Puakkuai suaknakhmun 1 cu Iran Natanz nuclear complex sungah a siih cuih hmun ih inn pakhat cu na nawn in a siat.

Iran rampi ral a simi Israel ram le United States in “Iran ram in a thupten atomic bomb a tuahtum” tiin leitlun mipi thei dingin an aupi rero lai hrawng ih suakmi puakkuainak a si ruangah, miṭhen cun Israel le US pawl ih cangvaihnak siding an zum nan, Iran ram cun accident a si tiin offcial in a phuang.

Iran Natanz nuclear complex cu Iran khuapi a simi Tehran ihsin peng 150 hlatnak hmun ah a um ih puakkuai suaknak hmun innpi zuk pawl cu “nuclear thawn pehpar awmi zianghman a umlo. Minung hrang ih ṭihnungmi thlisia suakter tuding khal a um lo” tiin Iran cozah in TV thuthang ah a thlah.

Iran cozah in puakkuainak ruangih a siat mi innpi zuk khal tamzet a suah nan innpi sunglam ih zukmi pakhat hman a tel lo.

Iram ram cun leitlun remdaihnak hrangah nuclear katuah loding tiin le nuclear tuahnak Uranium cu 3.67 percent hnakih tam ram sungah ka ret loding tiin 2015 ah hminkhennak a nei nan, tuah an ram sungih uranium neihnak cu 4.5 percent ah a kai zo a si.

Ramkhelthiam ṭhenkhat cun hih thuhla cu a phunphun in an rel ih “Iran in nuclear a tuah thup timi leitlun mipi thei dingin Israel le US in cangvainak an nei ih an tuahnak hmun cu leitlun mipi in oneline ah hmu ṭheh hai seh timi duhsannak thawn bomb an puah hrim a si”, “nuclear tuahnak ah cangsual ngaingai in thil a puak men mi siding. Curuangah puakkuai suaknak hmun pawl cu a lenglam zuk lawng mipi hmai ah an langter ih a sunglam zuk cu an thup” tiin Iran ram in nuclear a tuahthup an zum thu an sim celcel.

Curuangah leitlun ram tamzet cun Iran ram in nuclear a tuah thup an zum nan an ram cun ka tuah lo a si tiin official in a phuang a si.

ref:Anon,IStimes

Leave a Reply

Your email address will not be published. Required fields are marked *