Iran cozah in Pu Trump that tumnak Ca le Zuk an thlah?

Donald Trump bang zet mi golf thawi lai cu Drone/Raldonak vanzam thlaam vek si in a lang mi phenthlaam in a hliah zik lai fang zuk cu Iran Supreme Leader Ayatollah Ali Khamenei timi account thawn Twitter ah an thlah.

January 22 ih thlah mi a si ih zuk sung ahcun Drone/Raldonak vanzam thlaam (bangmi) in Pu Trump bang nawn mi golf thawi lai a khuh tum vekin a lang.

Hih zuk thawn pehpar in hmuhdan a phunphun a suak ih mitamsawn cun Iran cozah in Pu Trump that i phubalak an tum tiah zumnak an nei.

Leitlun ih social media larbik pakhat a simi Twitter rori ah US President hlun thattumnak ca an tar ih an hlawn sak cuanglo ti`n mipi lam in nasaten an sawisel ih Twitter lam in thuhla umdan zingzoinak an nei.

Nazi reizethnu lawngah Twitter lam in simfiahnak an nei ih “account lem a si. twitter ihsin kan hnong zo” tiah tlangthannak an nei.

Asinan BBC, CNN le US media picang tamzet cun Iran Supreme Leader Ayatollah Ali Khamenei thawn pehparawmi twitter account a si ko ti`n zumnak an nei a si.

Iran in Pu Trump an ral nak san
Nuclear ralthuam thu thawn pehparin Pu Trump par ah an lungawi lo.

US ralkap le mitamzet hrang ih ṭih a nung tiih an ruah mi General Qassem Soleimani cu January 2020 ah Pu Trump thupeknak thawn an kap mi Drone in a puah that.

Cumi ruangah Iran cozah cun phuba ka la tengteng ding ti`n tiamkamnak an rak nei dah zo ih, cuih ṭum Drone kap nak thawn pehpar mi US cozah officials mipum 40 luan le Donald Trump cu kaih an duh thu an rak tarlang dah.

Tukhalah Iran Supreme Leader Ayatollah Ali Khamenei thawn pehpar awknak a nei tiih ruah mi twitter account cun “ṭhulh a theih lomi phuba laknak kan nei ding. Kan General Soleimani tualthatnak ih a teltu hmuahhmuah cu hrem an si ding. A hun a thlen tikah a cangsuak tengteng ding” a ti.

Leave a Reply

Your email address will not be published. Required fields are marked *