InnsangPa in a Nupi Fanau hnakin Vuui a hril sawn

Bihar, India ih um Akhtar Imam cun leiram a neih mi hrek hnakih tamsawn cu sungkhat unau vek rori ih a duhdawt mi Vuui pahnih hnen ah a Ro`h ta.

Tubaite Kerela ram, thei-rah sung ah thil puak thei an ret mi ei ngah ruangih a thi mi Vuui fapawi thuhla a theih ihsin Vuui a duhdawtnak a luar sinsin ruangih thuthluknak a tuah mi a si.

An piang pekte ihsin a kilkhawi mi an siih Moti (kum 20), Rani (kum 15) ti`n hmin a pek hai. Kan dung kum ṭhaal lai ih a itthat lai ah misual pawl an inn sung ah lut tum ih an um lai ah Vuui pahnih cun an rak dawi tlan ruangah “misual kut ih thi dingmi i runsuaktu an si. ka bodyguard khal an si” tiin Akhtar Imam cun a sim.

Nupi fanau nei a siih a neih mi Loram hrek hnakih tam 2.5 hectares (6.2 acres) cu a vulh mi Vuui pahnih a pek ruangah a nupi le a fate pawl an lungawi lo.

Asinan a nih cun “Nu le pa neinawnlo, hnaṭuan theinawnlo, zohkhentu neinawnlo ruangih thi men Vuui pawl vek ih thih hloh men ding ka siang hai lo. Mi vekin a mawinak men ih ka vulh mi an si lo.”

“Ka innsungsang fanau ka duhdawt vek rorin ka duhdawt ruangah Ro ka tanta mi a si. Minung duhhamnak cu cem ti a neilo. Kan umnak leilungpi na pek hai a si khalle an duh tawk cuang lo ding” tiin a sim.

Akhtar Imam (kum 50) cu “Local Wildlife Trust” dintu a siih a duhdawimi Vuui pahnih kiltu dingah mi 4 a ret a si.