Indonesia Vanzam hlo mi thuthang UPDATE

January 9 ih hlo mi Indonesia Vazam Sriwijaya Air Flight SJ182 ih taksa ruang siatmi ṭhenkhat cu Java tipi thuanthum ah hmuhsuah a si thu Indonesia cozah in a phuang.

Boeing 737-500 Vanzam pheldarhmi cu Java tipi thuanthum thuklam feet 75 ah an hmu ih minung taksa tan mi le hnipuan bungrua mal lai an hmu tel cih.

Vanzam par ih hnaṭuan le a mawngtu telin Minung 62 phurtu Flight SJ182 cu Jakarta khawlipi in Pontianak lam pan ih a zamsuak hnu minute malte hrawngin an pehtlaih thei nawnlo ih a zamsuak hnu minute 4 hrawng ah minute 1 hnakih mal caankhiah sungah ft 10,000 lenglo ah a tla niam tiah Flightradar24 in a tarlang.

Flight SJ182 cu ralkap, Long ralkap le emergency service hnaṭuan mipum 300 luan in an hawl. Hawltu lakih telve ralkap ṭuanvonei mipakhat cun “January 10 ah Flight SJ182 Vanzam siatmi cu Java tipithuanthum sungah kan hmu. Taksa ruang ṭhen le hnipuan ṭhenkhat khal kan hmu tel cih.”

“Vanzam cangvaihdan record tu Black Box siding zumummi khal kan hmu. Vanzam in minung 62 a phur ih mi nungdam pakhat hman kan hmu lo. Tu ah kan hawl pehzom rero a si” a ti.

Vanzam totu zaten Indonesia rammi an si ih nauhak 10 telin passenger 50, Vanzam ih hnaṭuan 6, Vanzam dang ih hnaṭuan tuding minung 6, zatekom minung 62 an si.

“Vanzam hlo mi ah ka nupi le ka fa 3 an tel ve. Vanzam par an thleng hnu ah an nufa 4 ten an zukawmi khal in kuat. Umngaihdan khal ka thei lo. Ziangtin kan tuah thlang ding” tiah Vanzam tovetu innsangnui` pasal YamanZang in AP hnen ah a sim.

Boeing 737-500 cu kum 20 luan service a nei zo ih, tu ah, Indonesia cozah le Vanzam neitu company in a hloh dan zingzoinak an nei peh rero a si.

Leave a Reply

Your email address will not be published. Required fields are marked *