India ram Bus cangsual ah Minung 47 Nunnak Liam

India : February 16, tlawngkai nihnih zinglam ih Madhya Pradesh, Sidhi district ih bus cangsual ah minung 47 an thi.

Sidhi khua ihsin Satna lam an pan laifang ih bus cangsual a si ih minung 50 luan phurtu bus cu feet 25 hrawngih thukmi ziinkap tihriat (canal) sung ah a tlak.

Cozah hnaṭuan miruang sar ṭheutu Ravindra Kumar Choudhary in “zaan lam ih kan phorh suak mi thawn miruak 47 an si. Tuhrihtiang ahcu mipa ruak 25 nunau ruak 20 le naute ruak 2 kan phorhsuak zo.”

“Mawṭaw mawngtu telin mi 7 cu tidai an leuh ih an him dam. Bus totu mi 5 hrawng an kim lo. Khua a thim zo ruangah miruak kan hawl pehzom thei lo. Thaizing lam ah kan hawl leh ding” a ti.

An bus hi minung 35 todingmi a si nan minung 50 luan an to. Mawṭaw a rit tuk ruangah Lilawn ihsin ziinpi ih an pial zik fangah Lilawn kap hnor ngah in mawṭaw a sonawk ih tidai sungah a ril lan.

Bus cangsual thuthawn pehpar in India Prime Minister Narendra Modi in “Thihhlohnak tongtu innsang pawl cu rampumhuap in kan riahsiapi ve a si. Thihhlohnak tongtu innsang pawl hnen ah Rs. ting 2 ciar bomnak kan pe ding. Besia deuh ih hliamaw pawl khal Rs. 50,000 ṭanpinak kan pe ding” a ti.

India ram hi leitlun huap mawṭaw let tambiknak ram a si ih kumkhat ah ziinpi ih cangsualnak ah minung 150,000 hrawng an thi ṭheu. Mawṭaw/Mawṭaw cycle let tambik cu lamziin daan thlun lo ruangah le cak tukin mawṭaw an mawng ṭheu ruangah a si.

Leave a Reply

Your email address will not be published. Required fields are marked *