India ram ah Oxygen paam a tlung, ICU ihkhun le Oxygen daih lo ah Covid mina an thi cupco

India rampi cu Covid 19 in a nuai ih mina tuamhlawmnakding Siizung haideihlo ruangah le mina hiip dingmi Oxygen daih awlo ruangah Covid mina an thi cupco.

Delhi khualipi ih Sir Ganga Ram siizung lawng ah zaankhat ah covid mina 25 an thi. Cupawl cu Covid mina besia an si ih oxygen sambaunak ruangih thi an si. Cuvek thotho in India pumhuap hmun tamzet khalah harsatnak nasaten an tong.

Tuhlan thla 7 hrawng ih Covid 19 a roh zet lai ṭum khalah Oxygen daih awlo in India ram in buainak a rak tong zo. Nan, tuṭum cu a roh tuk cuang.

India healthcare facilities hin ramsung oxygen supply zaṭek 15% hman tlangpi a si ih culodang cu cetzung company tivekin an hmang thluh. Nan, tuṭum ṭumhnihnak Covid boruak cu a besia tukih ramsung oxygen supply zaṭek 90% (nitin hmanmi 7,500 metric tonnes) cu mina tuamhlawmnak ah an hmang thluh tiah India Senior health official Rajesh Bhushan in a ti.

Ṭumkhatnak Covid boruak luarbik September thla hrawngah nikhat ih an hmanmi oxygen cu 2,700 metric tonnes lawng a si. Ṭuṭum cu a hlan ai in let 2 luan rori`n Covid mina hrang ah oxygen hman a ṭul.

“Boruak a sia tuk ih Siizung ICU ihkhun a lawng hlan sung, nazi 12 sung tivek rori ambulance sungah Covid mina kan tuamhlawm lawk ṭul. Cuvek dinhmun cu kan si” tiah Pune khua ih Siizungpi doctor Siddheshwar Shinde in a ti.

Hmundang ihsin Pune ah Covid mina tuamhlawm dingin pan ṭheu a si nan tu ahcun ventilator hai deih loin khua dang ah mina tuamhlawm nakding an hawl ṭul ve thlang.

Dr. Siddheshwar Shinde cun “atlangpin cu kan siizung ah kan ṭul hai zat oxygen kan nei ṭheu. Nan, tubaite hrawng khan Covid mina an pung tukih besia luar an tam tuk ruangah Oxygen kan tlasam. Tu ṭum cu mino kum 22 mi hrawng khal Oxygen thluah an ṭul” tiah 9xNews hnen ah a sim ih “ziangtiktiang kan awh ding ti hi zo hman in kan sim thei lo. Tuṭum boruak vek kan thleng thei ti hi India cozah in a rak ruat ban lo si ding” a ti.

India state ṭhenkhat ahcun mah ramkulh hrang oxygen plants an nei ih cuvek hmun ta cah in India khuapi ṭhenkhat cu an buai vutvo.

Cutin, India khuapi hmun ṭhenkhat ih Oxygen mamawh tuk cu cozahpi in Oxygen phurtuding Oxygen Express Tlangleng a tlanter lawlaw.

“Oxygen plants hi a tu ṭulsamnakbik khuapi pawl thawn a hlataw tuk. Theitawk suahin kan cangvai rero nan a phur dan dingah harsatnak kan tong” tiah All India Industrial Gases Manufacturers Association president Saket Tiku in a ti.

India rampi ah hin thli Oxygen tifai in ti (liquid) ah cangter in Siizung ih supply tu factories 500 hrawng an um. Atamsawn cu tank phur motor thawn an kuat tlangpi.

Oxygen thun dingin tlaraw a ṭul ih nazi 1-2 an rei. Motor tank ih thun sung ah nazi 2 hrawng a rei. Cun khua dangdang an phur nakah tikcucaan a heu zet. Asancu Oxygen phur motor pawl cu nazi 1 ah km 40 hnak ih tam in (40kmph) an tlan sianglo. Cun, accident ding phang ah zaan ah khual an tlawng sianglo.

Cuvek a si tikah India ram Covid karhtuk cuangnak hmun tamzet ah Oxygen paam a tlung ih umnakding Siizung ihkhun haideihlo ruangah le Oxygen daih awlo ruangah mi an thi cupco.

Hitiih Covid a karh nasatuk cu ramkhel party tamzet cun a tufang India cozah dinglai Modi party hi mawh an phurh. Congress party hruaitu Rahul Gandhi cun “Corona virus hin Oxygen level a ti niam thei. Nan, Mithi an tam nak san cu Oxygen sambaunak le ICU ihkhun daih awlo ruangah a si. Cucu Government Of India ih mawh a si” a ti. A sim duhmi cu ṭumkhatnak Covid boruak hnu, India cozah in biaknak puai le ramkhel lamzawhnak a ong ruangah Covid a karh sal ti a sim duh mi a si.

Maharashtra, Oxygen plant ih ṭuanvonei Rajabhau Shinde khalin “Kan hnaṭuan dan ti kau ding cun bawmnak sumsaw kan mamawh tiah cozah ṭuanvonei hnen ah kan sim ringring. Culaiah zohmanin cuupcaap an ti lo. Nan, tu ah voilekhat ah Siizung le doctor pawl in thih le nun thu in Oxygen cylinder kan mamawh an ti thlang. Tuvek dinhmun thleng ding hi kan si lo. An sim ṭheu vekin tidai na haal hlan ah tikhur lai cia aw ti a si. Nan, kan rak tuah lo cu teh” a ti.

Tlawngkai ninga ah India ram ah Covid case thar 332,730 a um. Cumicu leitlun huap in Covid mina thar hmuh tambik record thar a si. Nazi 24 sungah register mithi 2263 an um.

Tudinhmun ah India ram ah Covid 19 mina 16.3 million hmuhsuah a si zo ih cumi ah 13.6 million damsal le 187K mithi an um a si.

Leave a Reply

Your email address will not be published. Required fields are marked *