India ram ah Covid 19 Vaccine an hmang thok +Siidawt hmaisabik hi zo a si?

Mipum 1.3 billion tlanlennak India rampi ah January 16 in Covid 19 dokhamsii vaccine an dawt thawk thlang.

January thla thok lam ih hmansiannak ngah zomi Covidshield le Covaxin cu hmaisabik ni ah siidawtnak center 3000 hrawng ah mipum 100 kiangkap fingfing an dawt a si.

Tuṭum ah mipum 300 million hrawng dawt thei an tum ih hmasabik ah doctor, nurses le harhdamnak lam hnaṭuan telin mipi hrang ih hnaṭuantu mipum 30 million lenglo an dawt hmaisa tum. Cuhnu ah upa kum 50 luan le damlonak dang nei cia mipum 270 million lenglo an dawt pehzom ding.

India ramhuap vaccine dawt hmaisabik cu Delhi ih um siizung hminthang All India Institute of Medical Sciences (AIIMS) ih Siizung thianfaitu Manish Kumar a si ih, amah cun “Covid 19 vaccine dawt hmaisabik lam ih ka tel thei cu kan lungawi tuk rori. Cozahpi par khal ah ka lungawi ih Siizung ṭuanvonei pawl hnen khalah lungawi thu ka sim duh a si” a ti.

India ram ih tlangzarh thokmi vaccine cu Oxford-AstraZeneca tuah, Serum Institute of India ih suah sawng mi Covidshield le Bharat Biotech tuah mi Covaxin pawl an si.

Covid vaccine an suah lohli theimi thu thawn pehpar in leitlunhuap mithiam pawl cun a him ngai pei maw tiah thusutnak an nei nan, Covid vaccine dawt thok dingih tlangautu Prime Minister Modi cun “a him lawlaw. Kiangkap ih rinhmang an simmi kha zum ding a si lo. Rinhlehnak zianghman umlo ten dawt cio uh si” a ti.

Tudinhmun ah India ram ah Covid 19 mina 10.5 million an um zo ih, cumi ah damsal 10.2 million le mithi 152K an um a si.

Leave a Reply

Your email address will not be published. Required fields are marked *