India ih an buaipi zetmi Video tawi cu a Lem a rak si ziar

Nurse pakhat in Sii um lomi syringe thawn kum upa lam mipakhat a dawt lai video cu atufang India internet khawvel ah a lar zet.

Video caption ahcun “fiangten zoh uh. Covid vaccine dawt ngaingai bangin mi an bum. India Siizung ah hivek an tam zet. Covid vaccine taktak cu black market ah an zuar sal” tiah an ngan.

Tulai India covid boruak thawn hih video hin mipi a ti thinheng zetih cozah soisel nakah hmangin video share sawngtu an tam zet. Miṭhen cun hih Siizung kan hawl dingih Siizung hnaṭuan pawl kan vuat that thluh ding titiangin sawmawknak a um. Mizo Whatsapp le Facebook group khal ah share sawngmi hmuh ding a tamzet.

Ramsung buainak tiang thlen theimi video a si ruangah India Today in zingzoinak a nei tikah India ram ih thil thleng siloin Mexico ih zukmi video sawn a rak si.

India Today cun simfiahnak an nei ih ” InVID tool hmangin reverse image search kan tuah tikah thu dik kan hmu suak. Vaccine dawt lai video cu Mexico, National Polytechnic Institute ih zukmi a si. Social media le Mexico thuthang tamzet khalin online ih an post mi hmuh ding a tam zet” tiah an tarlang.

Mexican newspaper EI Universal khalin official YouTube channel ah a tarlang ih, rintlak Mexico thuthang pakhat khalin “2021, April 3 ih thil thleng a si. Dikloih hnaṭuan Nurse nu khal a hnaṭuannak Mexican Institute of Social Security (IMSS) ihsin an bangter zo” tiah an tarlang ih IMSS khalin mipi hnen ah ngaidam a dil zo a si.

Leave a Reply

Your email address will not be published. Required fields are marked *