India : Emergency hrang ah Covid 19 Vaccine phunhnih hmansian a si zo

India ram ah emergency hrang ih hman dingin Covid 19 vaccine phunhnih hmansian a si zo thu Drugs Controller General of India in a tarlang.

“India company Bharat Biotech tuah mi COVAXIN le Oxford-AstraZeneca tuah mi (Serum Institute of India in a suah) Covidshield Covid 19 vaccine cu emergency hrang ah hman theih a si zo” tiah Drug Controller General of India (DGCI) chief VG Somani in ramsung media hnen ah a sim.

Somani in “Oxford-AstraZeneca tuah mi vaccine cun Covid 19 nathrik zaṭek 70.42 a kham thei. Ramsung company Bharat Biotech le Indian Council of Medical Research ih tuah mi COVAXIN khal a him zet ih emergency hrang ah hman theih a si zo” a ti.

India ramsung ih hmansian thok a si mi vaccine pahnih thu thawn pehpar in media lam ih thusutmi ṭhenkhat cu Somani in simfiah hrannak a nei lo nan “Zaṭek 100 rorin a him. Taksa, tisa nat le allergy tivek cu vaccine tinkim ih side effect a si” a ti.

India PM Modi in ramsung ih Covid 19 vaccine hman thok theih thlang ding cu a sunglawituk rori tiah a sim ve ih “India ramsung ah Covid 19 vaccine phunhnih hmansian a si thlang cu mipi hrang ah a sunglawi hlei ce” a ti.

India rampi cun a mipi 1.35 billion lak ihsin mipum 300 million hrawng cu tukum thla 6-8 sungah Covid 19 vaccine dawt thei a beisei.

Tu thla sung ah Covid 19 vaccine tlangzarh thok thei ding khalin beiseinak a um ih Leitlun vaccine suah company tumbik a simi SII khal in AstraZeneca/Oxford tuah mi Vaccine cu 50 million dose timlam in a ret ṭha zo.

Cumi vaccine pawl cu cozah hnen ah dose khat ah 250 rupees ($3.42) in a zuar tum ih private market ahcun 1,000 rupees thawn zuarsuak a tum a si.

Tu dinhmun ah India ram cu Leitlun Covid 19 mina tambik ram US sangtu a si ih ramsung ah mina 10.3 million an um zo. Cumi lakah mipum 9.93 million an damsal ih minung 149K an thi a si.

Leave a Reply

Your email address will not be published. Required fields are marked *