India cozah in Myanmar raltlan pawl ramdang feh thei lo dingin lamzin phit sak

India ram ah raltlan dinhmun in kum 10 luan kan um zo ih, fanau sungkhat unau hrang ruatin ramthumnak thleng thei kan beisei. Kan sungten harsatnak phunphun pahtlang in hnamdang biaknakdang pawl lakah kum 10 luan kan talbuai zo.

Ramdang thleng zo sungkhat unau le rualṭha pawl zar ah bulpak bawmnak thawn ramdang feh dingin Embassy lam in in ko zo nan pulhnatpi boruak ah caan sau zet a lak in kan hmangliam.

India ihsin ramdang feh dingah thil tawlrel ṭul tamzet a um ih thil ṭul poimawh tamsawn cu kan tawlrel khawsuak zo. Athupi zetmi hriselnak lam zohfelnak khal kan nei zo ih zianghman buaibainak umloten kan tuah suak zo.

Culai ah pulhnatpi boruak in in man ih India cozah in ramleng suak a khap ruangah le kan feh nak ding ramthumnak cozah pawl in an ram him theinak hrangah ramdangmi lutsuak an khap ih, cumi boruak ah caan sau zet India ram ah kan tang lala.

Boruak a kiang ih ramdang lutsuak an saing sal tikah Embassy lam in theihternak in tuah sal ih a thar in in ko sal. Thil ṭul poimawh pawl tawlrel a si ih hriselnak lam khal ceekawknak atharin kan nei sal. Cuih ṭum khalah buaibainak umloten kan tuah khawsuak ih, atakin ramdang kan feh thei thlang ding ti`n kan tha tho zet.

Embassy in tu thla August sung hrang vanzam ticket lak dingin theihternak in tuah bet tla cu kan sungten Lungawi mitthli a tla. Cuvek boruak tiang kan thleng zo ih, netabik tuah ding mi thil ṭul pakhat lawng a tang.

Cumicu India cozah hnen ihsin siannak lak ding a si ih, tu hlan ramdang feh zo pawl tuah dan keel ten India cozah hnen ah kan dil ve.

Nan, India cozah in thuhla zianghman simfiahnak nei loin kan dil mi cu in vuak thlak sak. Kan feh nak ding ramthumnak Embassy lam ah kan simthei nan an nih lam in ti thei mi zianghman kan nei lo in ti. India cozah thu liolio a si tiah in sim.

India cozah hin Myanmar rampi a buai hnu ihsin India sung ih um Kawlram raltlan hmuahhmuah a zoh dan a danglam zet. Ramdang feh thei lo dingin dilnak in vuak thlak sak mi hi kan mah sung lawng kan si lo. Midang khal tampi an um. Paisa cawi in vanzam ticket leizotu khal an um ih, cumicu lolak ah a cang thluh.

Mizaan tihni lam khalah Kawlram ralhraang ralkap in Insein thawngtlak mi 4 an thlai that thu thawn pehpar in Delhi ih um Kawlrammi pawl duhphorhnak an nei tum nan Khawsung lam pan in mawṭaw thawn an poksuak ciah ah palik pawl in feh an khap.

Ni 3 duh in duhphorhnak hrang siannak Ca ken an lak zo nan a ni a thlen taktak tikah palik pawl in hruaitu ṭhenkhat an ko. Cupawlcu duhphorhnak tuah lo dingin palikzung ah hminkhennak an tuahter. Lamzawh duhphorhnak an khap nak san an sut tikah kan lo sim thei lo ti`n an rak ti.

Atufang India ram ih um Kawlrammi raltlan pawl hmakhua a pit zet in a lang ih, ramdang teh kan thleng thei ngai pei maw? India cozah in ziangruangah Kawlram raltlan ṭhiṭhain a zoh duh lo timi cu atufang India ram ih um Myanmar raltlan pawl awloksong tertu thuhlapi pakhat a si. (Delhi ih um Chin raltlan)

Leave a Reply

Your email address will not be published. Required fields are marked *