India cozah cu Leitlun huap mipi hmai ah Mualpi a Pho

Dinglai India cozah cu Covid boruak ṭumkhat nakah rampi ukhruai ṭha zetin a ruataw ih, cuhnu, daithlang zetin a um cu Leitlun mipi hmai ah Covid ṭumhnih nakin mualpi a phoh.

Tu ah, cozah daithlan ruangah India ram cu nikhat pumhlum ih Leitlun huap Covid 19 karhcakbik ram ah a hung cang. A zonzon in ni 5 sung Covid karhcakbik world record a kai ban.

India cozah in ṭumkhatnak Covid a deem hnu ah biaknak puai, election hrang lamzawhnak tivek zalen zetin a on. Cumicu, Covid ṭumkhat nakih rampi tlaksiatnak tungding sal lohli tumin hamṭamnak lungput thawn a tuahmi a si ih cumi ruangah tuvekin India mipi in an tuar mi a si tiah mithiamsang pawl in an sim.

India ram ah Covid ṭumkhatnak a luarbik lai cu 2020 september ah a si ih nikhat hnu nikhat natnak a deem vivo. Nan, cozah thlahdahaw ruangah 2021, March hrawngin Covid ṭumhnihnak a ṭan ih April thla lai hrawng khan Covid nat nei vansang ah an kai.

Nikhat hnu nikhat Covid natnei an pung ih cozah Siizung ah mina enkolnakding hmunram a um nawn lo. Abikin Delhi ah natnei an pung cak ve cuang ih natdang thawn Siizung um cia besia tuklo cu Covid mina kian dingin inn lam ah an tlun ter thluh. Cuti cingin Covid mina umnak ding hai a deih lo ih private siizung le kum upa enkolnak nursing home tiang Covid Siizung ah an hmang.

Siizung umnak colo ruangah le Covid mina besia hiip dingmi oxygen daihawlo ruangah mina pawl an thi cupco. Mina besia an tam tukih Delhi ah minute 4 dan in covid mina an thi.

Chin raltlan lak khalah Covid ruangih thi mino pakhat a um zo. Nat nei khal an tamzet zo ih nunnak hrang tiang phan sak um mina besia khal hnih-thum an um. Culai ah kohhran ṭhenkhat cu an khawm hramhram. Tuvek dinhmun ruangih Khawm ngamlo cu thlarau thazang mal tiah miṭhen in an ti ..???

Mithi urnak khal an daih awlo ih ur dingmi mithi cu a tlar in an tlar. Veng ṭhenkhat ah cu urnakding thing an daih awlo ruangah cawp le cilh in khuatlang mipi cawlh hahdamnak hrangih tuahmi “Park” sungta thingkung an hau. Cumicu veng kiangkap pawl in twitter ah an tar nasa ih India cozahpi a phuhrung awtuk ruangah le Covid boruak ih rampi an kai hruai dan soiselnak cu social media ah lang theilo dingin India twitter, Facebook hnaṭuan pawl hnen ah block dingin ca an kuat. Cumi thuthup online ah a puut cu India cozahpi a mualpho sinsin.

Mina hiip ding Oxygen khal an daihaw loih Singapore ram ta vanzam thawn an phur rero zo. Ramdangdang khalin kuat belh dingin India cozah an tiam. India thawn ralaw zetmi China ram khalin India dinhmun besia tuk cu zoh men thei nawn loin ‘in siang cun kan lo bawm ding’ tiah India cozah hnen ah ca an kuat.

US, UK, Germany le ramdangdang khalin Siivai le a ṭul mi hmuahhmuah bawmnak pe dingin hmalaknak an nei rero.

Tlawngkai nikhat, April 26, rampumhuap covid case thar cu 352,991 a si ih mithi 2,812 an um. Cumicu, nizi 24 sung leitlun huap Covid karhcakbik record thar ninganak a si. Cukhalcu Cozah Official record a siih Siizung haideihlo le mithi urnak catbang loih meikhu a um ringring mi cun mithiam pawl thin a hring ter. Mithiam ṭhenkhat cun cozah record mi hnakih letkhat tam khal a si thei tiah an sim.

Tudinhmun ah India ram cu leitlun Covid 19 mina tambiknak US ram sangtu a si ih natnei 17.3 million hmuhsuah a si zo. Cumi ah 14.3 million damsal le 195K mithi an um ih nat karh cak dan rate ahcun US ram hnakin India ram a cak sawn.

Leave a Reply

Your email address will not be published. Required fields are marked *