India : Covid 19 Vaccine side effect tuarluan mipum 447 le mithi pakhat a um

2021, January 16 ihsin India ram ah Covid 19 vaccine tlangzarhnak an nei thok ih nihnihnak tiangah mipum 2,24,301 lenglo an dawt zo.

Siidawt zo mipum ting 2 luan ah minung 447 in side effect na cuang in an tuar ih mipakhat a thi tiah India ramsung media pawl in a tarlang.

Mithi tu cu Uttar Pradesh, Moradabad district Siizungpi ih ward servant a si ih, zarhte sun ih vaccine an dawt hnu zaan lam ah cawlh lak loin hna a ṭuan pehzom. Zarhpi ni ah Ṭang/Awm na ciamco in a um ih thawsam in a thi. Sii an dawt mi cu Covidshield vaccine a si ih, Doctor pawl cun side effect ruangah a thi mi siding an zum.

Cupa thih thu cu India Harhdamzungpi in a tarlang lo ih, official in cu “Nihnihsung kan dawt mi ah natuklo side effect tuartu mipum 447 an um. Cumi ah mipathum lawng siizung an thleng” tiah an tarlang.

Harhdamzung lam cun Siizung thleng mipathum an um ih pahnih an suak zo tiah an tarlang nan ramsung media pawl cun zarhte sun ih siidawt mi lawng ah amalbik mipum 12 lenglo siizung an thleng ti`n report a um tiah an ngan a si.

India ram ih hmanthokmi Covid 19 vaccine cu Oxford-AstraZeneca tuah, Serum Institute of India ih suah sawng mi Covidshield le ramsung company Bharat Biotech tuah mi Covaxin an si.

Nawt zetin an tuah hlei ah an tuah ṭhehsuak oltuk ruangah Leitlun thiamsang pawl cun a him ngaingai pei maw ti`n thusutnak an nei nan, India Prime Minister Modi cun “a him lawlaw. Kiangkap ih rinhmang an simmi kha zum ding a si lo. Rinhlehnak zianghman umlo ten dawt cio uh si” tiah mipi hnen ah a sim a si.

Leave a Reply

Your email address will not be published. Required fields are marked *