Inauguration puaipi cu “Firework” timi hla thawn Katy Perry in a khar

US President thar thukamnak puaipi cu tumtah timlamnak an nei cia vekin January 20 ah buaibainak umloten tluang zetin an tuahsuak.

US cozah ṭuanvonei tamzet le US President hlun Barack Obama, Bill Clinton le George W Bush te khal in an telpi thei.

US President thar Joe Biden le Vice President thar Kamala Harris cun kum 4 sung US mipi hrangah an fimthiamnak hmuahhmuah suahin rampi tungdingsal dingin ṭan an la ding thu thutiamkamnak an nei.

Tlailam khalah President thar sunloihnak hrang timlamnak an nei cia vekin caan an hmang ih leitlun hlasakthiam hminthang ṭhenkhat in hlasaknak thawn US President thar lawmnak an nei.

US President hlun Bill Clinton, George W. Bush le Barack Obama te pawl in Biden Inaugural Committee sungtel dinhmun in thucahtawi lungawithu simnak an nei cia mi video tawi khal thlahsalnak an nei ih NASA astronauts pawl in boruak par ih Inauguration Day an hmannak, thucahtawi lungawithu an sim lai video khal an thlah.

President thar lawmnakpuai caan hman cu Hollywood lemcang Tom Hanks in a kaihruai ih hlasakthiam hminthang Foo Fighters, John Legend, Bruce Springsteen, Demi Lovato, Justin Timberlake, Ant Clemons le Jon Bon Jovi te pawl in hlasaknak thawn US President thar an lawm.

Covid boruak a si vekin hmunkhat ah caan hmangtlang ding a remcang thiamlo ruangah hlasakthiam ṭhenkhat cun President lawmnak hrang hla an sak lai cu an rak record cia ih tlailam caan hman tikcu ah TV in an thlah sal.

2021, US President thar thukamnak le Sunloihpuaipi cu hlasakthiam Katy Perry in a hla hminthang Firework timi hla thawn a khar ih meisa par/ṭeek phunphun an kap ciamco.

Leave a Reply

Your email address will not be published. Required fields are marked *